Ministria e Jashtme palestineze dhe grupi islamik Hamas lëshuan deklarata të kundërta të premten në përgjigje të miratimit nga Këshilli i Sigurimit i Kombeve të Bashkuara të një rezolute që synon të ndihmojë në sjelljen e më shumë ndihmave humanitare në Rripin e Gazës.
Ministria e Jashtme palestineze, e cila është pjesë e Autoritetit Palestinez me bazë në Bregun Perëndimor, e quajti rezolutën “një hap në drejtimin e duhur” dhe tha se ajo do të ndihmonte “për t’i dhënë fund agresionit, për të siguruar mbërritjen e ndihmave dhe për të mbrojtur popullin palestinez.”
“Ne e konsiderojmë një hap që mund të kontribuojë në zbutjen e vuajtjeve të popullit tonë në Rripin e Gazës”, thuhet në deklaratën e Ministrisë së Jashtme.
Mirëpo Hamasi, militantët që drejtojnë Gazën, e quajtën rezolutën një “hap të pamjaftueshëm” për plotësimin e nevojave të enklavës së varfër.
“Gjatë pesë ditëve të fundit, administrata e SHBA-së ka punuar shumë për të larguar këtë rezolutë nga thelbi i saj dhe për ta nxjerrë atë në këtë formulë të dobët… Ajo sfidon vullnetin e komunitetit ndërkombëtar dhe Asamblesë së Përgjithshme të Kombeve të Bashkuara për të ndaluar agresionin e Izraelit kundër popullit tonë të pambrojtur palestinez”, thuhet në deklaratë.
Më herët të premten, mes zemërimit global për rritjen e numrit të vdekjeve në Gaza në 11 javët e luftës midis Izraelit dhe Hamasit dhe një krize humanitare në përkeqësim në enklavën palestineze, SHBA abstenuan për të lejuar Këshillin e Sigurimit prej 15 anëtarësh të miratojë një rezolutë të hartuar nga Emiratet e Bashkuara Arabe.
