Sekretari amerikan i Shtetit, Antony Blinken është takuar me zyrtarë të lartë turq ku e ka filluar një turne diplomatik që ka për synim shmangien e një lufte më të gjerë rajonale në Lindjen e Mesme dhe mbledhjen e mbështetjes arabe për qeverisjen e pas konfliktit të Gazës.
Diplomati i lartë amerikan u takua sot me presidentin e Turqisë, Rexhep Tajip Erdogan, i cili gjatë kohëve të fundit ka lëshuar deklarata të ashpra kundër shtetit të Izraelit dhe Kryeministrit Netanyahu. Lidhur me situaten ne Lindjen e Mesme është diskutuar më herët gjatë ditës edhe me ministrin e Jashtëm Hakan Fidan.
Në këto takime, Blinken “ka theksuar nevojën për të parandaluar përhapjen e konfliktit, të sigurojë lirimin e pengjeve, të zgjerojë ndihmën humanitare dhe të zvogëlojë viktimat civile”, tha zëdhënësi i Departamentit të Shtetit Mattheë Miller.
Blinken gjithashtu theksoi nevojën për të punuar drejt paqes më të gjerë, të qëndrueshme rajonale që siguron sigurinë e Izraelit dhe përparon krijimin e një shteti palestinez, tha ai.
Blinken dhe ministri i Jashtëm Hakan Fidan në takimin që kanë pasur më herët kishin diskutuar për luftën dhe krizën humanitare në Gaza, plus procesin e Turqisë për të ratifikuar anëtarësimin e Suedisë në aleancën ushtarake të NATO-s, tha Ministria e Jashtme e Turqisë në një deklaratë.
Zyrtarët amerikanë janë të frustruar nga procesi i gjatë, por janë të bindur se Ankaraja do të miratojë së shpejti pranimin e Suedisë pasi fitoi mbështetjen e parlamentit turk muajin e kaluar, tha një zyrtar i lartë i Departamentit të Shtetit që udhëton me Blinken, duke folur në kushte anonimiteti.
Ligjvënësit amerikanë kanë pezulluar shitjen e avionëve luftarakë F-16 në Turqi, derisa ajo të nënshkruajë shtimin e Suedisë në Organizatën e Traktatit të Atlantikut të Veriut.
Suedia, e cila së bashku me Finlandën aplikoi për t’u bashkuar me NATO-n pas pushtimit rus të Ukrainës në fillim të vitit 2022, do të bëhej anëtari i 32-të i aleancës. Finlanda u bashkua vitin e kaluar./Reuters
