Paramentra më kufizuese të mesazheve të drejtpërdrejta dhe mundesi të reja të mbikëqyrjes nga prinderit. Këto janë disa veçori të reja nga Meta për të mbrojtur adoleshentët në Instagram dhe Facebook.
Në lidhje me veçorinë e parë të re, aftësia për të marrë mesazhe direkte nga njerëz që nuk i ndjekin ose nuk janë në kontakt, duke përfshirë adoleshentët e tjerë, është çaktivizuar si parazgjedhje në Instagram për ata nën 18 vjeç.
Ata mund të marrin mesazhe ose të shtohen në bisedat në grup nga njerëz që tashmë i ndjekin ose me të cilët janë të lidhur. Meta shpjegon se këtë ndryshim po e bën edhe në paramentrat e paracaktuara për adoleshentët në Facebook Messenger.
Gjithashtu risi kemi edhe për mbikëqyrjen prindërore e nisur në Instagram në vitin 2022. Tani, prindërve që përdorin këtë mjet do t’u kërkohet të miratojnë ose refuzojnë kërkesat nga adoleshentët nën 16 vjeç për të ndryshuar parametrat e parazgjedhura të sigurisë dhe privatësisë në një gjendje më pak kufizuese.
Për shembull, nëse një adoleshent që përdor mbikëqyrje përpiqet të ndryshojë llogarinë e tij nga private në publike ose përpiqet të ndryshojë parametrat e mesazheve të drejtpërdrejta, prindërit do të marrin një njoftim për të miratuar ose refuzuar ndryshimet e kërkuara.
Së fundmi, Meta njofton se në muajt në vijim do të lansojë një funksion të ri për të mbrojtur adoleshentët nga shikimi i imazheve potencialisht të papërshtatshme në mesazhet e tyre nga persona që njohin dhe për t’i dekurajuar ata që të dërgojnë imazhe të tilla.
“Ne duam që adoleshentët të kenë përvoja të sigurta, të përshtatshme për moshën në aplikacionet tona. Ne kemi zhvilluar më shumë se 30 mjete dhe veçori për t’i ndihmuar ata dhe prindërit e tyre dhe kemi shpenzuar më shumë se një dekadë duke zhvilluar politika dhe teknologji për të adresuar përmbajtjen dhe sjellje që thyen rregullat tona”, thotë Meta në një postim zyrtar./Informim/
