Presidenti i SHBA Joe Biden ka treguar sot (e marte) se ai ka vendosur se si do t’i përgjigjet sulmit me dron që vrau anëtarët e shërbimit amerikan në Jordani, ku ai le të kuptohet se do të ndëshkoi milicët e mbështetur nga Irani pa shkaktuar një luftë më të gjerë.
Biden, duke folur me gazetarët teksa largohej nga Shtëpia e Bardhë në një udhëtim fushate në Florida, nuk elaboroi vendimin e tij, i cili erdhi pas konsultimeve me këshilltarët kryesorë në Shtëpinë e Bardhë.
Ai tha se Shtetet e Bashkuara nuk kanë nevojë për një luftë më të gjerë në Lindjen e Mesme, duke i bërë jehonë komenteve të zyrtarëve të tjerë që ishin deklaruar sot (e marte) se Shtetet e Bashkuara nuk duan një luftë me Iranin.
Biden ka peshuar opsionet e tij dhe pritshmëria ka qenë se do të ketë sulme hakmarrëse, por koha e përgjigjes ka qenë e paqartë.
“Unë nuk mendoj se ne kemi nevojë për një luftë më të gjerë në Lindjen e Mesme. Kjo nuk është ajo që unë po kërkoj,” tha Biden.
Biden u përgjigj “po” kur u pyet nëse ai kishte vendosur se si t’i përgjigjej sulmeve.
I pyetur nëse Irani ishte përgjegjës, Biden shtoi: “Unë i mbaj ata përgjegjës në kuptimin që ata po furnizojnë me armë” ata që i kryen sulmet.
Tre pjesëtarë të shërbimit amerikan u vranë dhe të paktën 34 u plagosën në një sulm me dron nga militantët e mbështetur nga Irani ndaj trupave amerikane në Jordaninë verilindore pranë kufirit me Sirinë, paten thënë zyrtarët të dielën./Reuters
