Kryetari i AAK-së, Ramush Haradinaj, mori pjesë në ceremoninë e ndërrimit të komandës së Njësisë së Specializuar Shumëkombëshe që vepron në kuadër të KFOR-it italian në Kosovë.
Haradinaj deklaroi se anëtarësimi i Kosovës në NATO do të forconte paqen dhe sigurinë në vend dhe rajon.
Gjithashtu, i pari i AAK-së ka thënë se Italia ka dhënë kontribut të madh për paqen dhe sigurinë në Kosovë.
“Italia është një nga kontribuuesit më të mëdhenj të paqes dhe sigurisë në kuadër të misionit të KFOR-it në Kosovë, duke luajtur rol edhe në shumë procese të rëndësishme për vendin. Partneriteti mes dy vendeve tona i krijuar prej vitesh, duhet të thellohet e zgjerohet në procese të rëndësishme që kemi përpara, siç është anëtarësimi i Kosovës në NATO, akt ky që do e forconte paqen dhe sigurinë në vend dhe rajon dhe në këtë synim, roli i KFOR-it është i jashtëzakonshëm”, ka thënë Haradinaj.
Haradinaj ka falënderuar gjeneralin Ruggerio Capodivento për angazhimin profesional dhe miqësor gjatë shërbimit të tij në Kosovë, teksa i uroi mirëseardhje kolonelit Rosati, me urimet më të mira për sukses në detyrën e re.
