Ukraina rrëzoi 29 nga 30 raketat e lëshuara nga Rusia në sulmet ajrore gjatë natës, por një person u vra në një sulm në qytetin jugor të Odesës, tha të enjten ushtria ukrainase.
Tymi i zi mbushi qiellin mbi Kiev gjatë sulmit të nëntë në kryeqytet këtë muaj. Rënia e mbeturinave nga raketat e goditura nga mbrojtja ajrore shkaktoi zjarre në pjesët lindore të Kievit, duke shkaktuar dëme të vogla, por jo viktima në kryeqytet, thanë zyrtarët.
Ushtria e Ukrainës tha se breshëria e 30 raketave të lëshuara nga Rusia gjatë natës përfshinte raketa lundrimi të lëshuara nga deti, ajri dhe toka dhe se dy drone sulmuese Shahed të prodhuar nga Irani dhe dy dronë zbulues ishin rrëzuar.
“Të gjitha objektivat mbi Kiev u rrëzuan,” tha gjenerali Valeriy Zaluzhnyi, komandanti i përgjithshëm i forcave të armatosura, në një deklaratë të postuar në aplikacionin e mesazheve Telegram.
Një dëshmitar në Kiev me një xhaketë blu, i cili nuk dha emrin e tij, tha: “Ishte një shpërthim shumë i fuqishëm. Më pas pashë tymin. Kuptova se mbeturinat ranë në garazhe, e imja është afër. Unë tani po i shoh mbeturinat e raketes.”
Zyrtarët në Odesa thanë se një objekt industrial i paspecifikuar ishte goditur kur një raketë u rrëzua në tokë pasi u godit nga mbrojtja ajrore, duke vrarë një person dhe duke plagosur dy.
Rusia, e cila nisi pushtimin e saj në shkallë të plotë të Ukrainës në shkurt 2022, ka shtuar sulmet ajrore javët e fundit ndërsa Ukraina përgatitet të nisë një kundërofensivë në përpjekje për të rimarrë territorin e pushtuar.
Pas sulmeve veçanërisht të rënda ajrore në Kiev të martën, Ukraina tha se kishte rrëzuar gjashtë raketa ruse “Kinzhal”. Moska më vonë mohoi humbjen e gjashtë prej raketave hipersonike për të cilat thotë se janë të pandalshme.
Edhe Rusia tha se kishte shkatërruar një sistem të mbrojtjes raketore Patriot të prodhuar nga SHBA gjatë sulmeve të së martës, por Ukraina e mohoi këtë. Zëdhënësi i forcave ajrore ukrainase Yuriy Ihnat tha të enjten se sistemi Patriot po përdoret nga Kievi.
“Prandaj, u kërkoj të gjithëve të qëndrojnë të qetë. Mbrojtja ajrore po punon dhe do të vazhdojë të ofrojë mbrojtje,” tha ai për televizionin ukrainas.
(Burimi: Reuters)
