Ministrja e Punëve të Jashtme dhe Diasporës, Donika Gërvalla, është pritur në një takim zyrtar nga homologu i saj austriak, Alexander Schallenberg.
Gërvalla e ka njoftuar homologun austriak rreth proceseve të brendshme politike në vend, duke prezantuar progresin e arritur në demokratizim, sundim të ligjit, rritje ekonomike, respektim të të drejtave të njeriut, liri të mediave dhe infrastrukturë moderne për investime ndërkombëtare.
“Temë tjetër me rëndësi e diskutuar mes dy mistrave ishte edhe informimi në detaje rreth veprimeve destabilizuese të Serbisë, si sulmi në Banjskë, sulmi ndaj KFOR-it dhe veprimeve tjera që rrezikojnë paqen dhe stabilitetin në Ballkanin Perëndimor”, thuhet në njoftimin e ministrisë së Jashtme të Kosovës.
“Ministrja Gërvalla dhe Ministri Schallenberg biseduan edhe për integrimin e Kosovës në Këshillin e Evropës dhe organizata tjera ndërkombëtare”, thuhej veç të tjerash në këtë komunikatë.
