Drejtori i Drejtorisë për Hetimin e Trafikimit të Qenieve Njerëzore në Policinë e Kosovës, Riza Murati, dyshohet të ketë ushtruar dhunë ndaj bashkëshortes së tij për çka po hetohet për veprën penale “Dhunë në familje”.
Incidentin, që ka ndodhur këtë javë, për Klan Kosova e ka konfirmuar edhe Inspektorati Policor i Kosovës, ku po trajtohet rasti, në bashkëpunim me Prokurorinë e Shtetit.
“Duke ju referuar kërkesës suaj IPK ju konfirmon se është duke trajtuar rastin në fjalë dhe rasti është në fazën e hetimeve preliminare. Të gjitha veprimet në lidhje me rastin janë duke u ndërmarrë në koordinim me Prokurorinë e Shtetit” – thuhet në përgjigjen e IPK-së.
IPK nuk është përgjigjur nëse kanë propozuar apo marrë ndonjë masë disiplinore ndaj drejtorit të DHTQNj në Policinë e Kosovës, ndërkohë që Klan Kosova po pret përgjigje edhe nga Prokuroria Themelore e Prishtinës për të mësuar veprimet e ndërmarra.
