Shtetet e Bashkuara kanë qarkulluar një projekt-rezolutë të Këshillit të Sigurimit të OKB-së që bën thirrje për një “armëpushim të menjëhershëm të lidhur me lirimin e pengjeve” në Rripin e Gazës, ka thënë sekretari i shtetit, Antony Blinken.
Diplomati e bëri njoftimin e tij gjatë një turneu në Lindjen e Mesme që do të përfshijë edhe një ndalesë në Izrael, raporton agjencia e lajmeve Agence France-Presse (AFP).
Mbështetësi kryesor i Izraelit, SHBA-ja, ka vënë veton ndaj votave të mëparshme të Këshillit të Sigurimit të OKB-së për luftën gati gjashtëmujore, duke kundërshtuar që në shkurt përdorimin e termit “i menjëhershëm” në një draft të paraqitur nga Algjeria.
Megjithatë, në javët e fundit, Washingtoni ka rritur presionin ndaj aleatit të tij, duke këmbëngulur që militantët e Hamasit duhet të lirojnë menjëherë pengjet e kapur gjatë sulmeve të tij të 7 tetorit në Izrael.
“Në fakt ne kemi një rezolutë që kemi paraqitur tani që është përpara Këshillit të Sigurimit të OKB-së që bën thirrje për një armëpushim të menjëhershëm të lidhur me lirimin e pengjeve dhe ne shpresojmë shumë që vendet do ta mbështesin atë”, ka thënë Blinken në Arabinë Saudite.
“Unë mendoj se kjo do të dërgonte një mesazh të fortë, një sinjal të fortë”, i ka thënë ai medias saudite Al Hadath të mërkurën.
“Sigurisht, ne qëndrojmë me Izraelin dhe të drejtën e tij për të mbrojtur veten, por në të njëjtën kohë, është e domosdoshme që civilët që janë në rrezik dhe që po vuajnë kaq tmerrësisht – të fokusohemi tek ata, t’i bëjmë ata prioritet, duke mbrojtur civilët, duke u dhënë atyre ndihmë humanitare”, është shprehur Blinken.
Zyrtarët amerikanë kishin negociuar një tekst alternativ që kur bllokuan një projekt-rezolutë algjeriane që bën thirrje për një “armëpushim të menjëhershëm humanitar” në Gaza në fund të shkurtit.
Sipas burimeve diplomatike, kjo alternativë, e fokusuar në mbështetjen për një armëpushim gjashtë-javor në këmbim të lirimit të pengjeve, kishte pak shanse për të fituar miratimin.
