Filozofi dhe publicisti Shkëlzen Maliqi, në një intervistë për gazetën e përjavshme në Serbi “Radar”, ka folur edhe për zhvillimet politike në Kosovë dhe Serbi dhe figurat që udhëheqin në këto dy vende. I pyetur për politikanët, Maliqi ka ndarë përvojën e tij me Kryeministrin e Shqipërisë Edi Rama, i cili vite më parë e kishte angazhuar si këshilltar.
Maliqi ka mendim të mirë për Ramën. Atë e konsideron si një politikan me energji të pashtershme. Por, sipas tij, Rama këshilltarët i ka trajtuar më shumë si dekor.
Nga të gjithë politikanët që keni njohur, me të cilët keni punuar, për kë keni mendimin më të mirë?
Mendimin më të mirë e kam për Edi Ramën. Në kushte kakofonike dhe thuajse të pamundura, ai arriti të rivendoste dhe të trasonte ringjalljen e Tiranës dhe më pas të Shqipërisë. Ai ka vizion dhe energji të pashtershme. Me të shoqërohesha më intensivisht në vitet ’90, kur ai ishte artist. Kur u bë politikan, e shihja më rrallë, sepse duhej të komunikoja me të përmes kabinetit. Që nga viti 2005 kam bërë sondazhe të opinionit publik kryesisht për kundërshtarët e tij politikë, ndaj njerëzit që e rrethonin mendonin se unë mbështesja Sali Berishën. Por ishte thjesht një punë. Në vitin 2011, kur ai kishte humbur zgjedhjet për kryetar të Bashkisë së Tiranës dhe Partia e tij Socialiste ishte në një krizë të vogël, më ftoi të bëja hulumtime për të, për të parë se cilat ishin shanset e tij në zgjedhjet e përgjithshme. Hulumtimet treguan se ai nuk mund të fitojë zgjedhjet nëse nuk kthehet në koalicion me partinë e Ilir Metës që e kishte braktisur Partinë Socialiste. Ai fitoi zgjedhjet bazuar në atë formulë, por paraprkisht njerëz të tjerë punuan që ai të pajtohej me Metën. Kur u bë kryeministër, më ftoi si këshilltar për rajonin, sepse donte të përmirësonte marrëdhëniet me të gjitha vendet e rajonit, veçanërisht me Serbinë. Puna ishte interesante, por kishte shumë protokoll, ku ne, këshilltarët e tij, ishim dekor. Kam qëndruar këshilltar në mandat jo të plotë deri në mesin e vitit 2016. Tani e takoj ndonjëherë në ekspozitat që organizoja në Qendrën për Hapje dhe Dialog në katin përdhesë të godinës së qeverisë në Tiranë