Pasi bashkë me presidentin e Komitetit Olimpik, Ismet Krasniqi, mbollën pemën olimpike, Kurti u ndal para gazetarëve për një prononcim. Kurti është kthyer nga Turqia pas katër ditësh qëndrim, e në ndërkohë në vend është publikuar një përgjim ku protagoniste është shefja e grupit parlamentar të VV dhe Milan Radojiçiq.
Kurti tha se nuk i ka dëgjuar incizimet, mirëpo shtoi se qytetarët e kanë shumë të qartë se pse Radojiçiqi ikë tash e dikur ishte në kryeministri
“Unë vete nuk i kam dëgjuar, mirëpo qytetarët e Republikës së Kosovës e dinë se kush ka bashkëpunuar me Radojiçiqin edhe e kanë shumë të qarte pse Radojiçiq ka ikë tash e dikur ishte në kryeministri.”
Kurti tha se zëdhënësi i VV’së, Arlind Manxhuka, e “ka dhënë përgjigjen e saktë dhe të qartë”.
“Për këtë zëdhënësi i subjektit ku unë jam kryetar, Lëvizja Vetëvendosje, Arlind Manxhuka e ka dhënë përgjigjen e saktë e të qartë.”
Gazetarët e pyetën se pse Mimoza Kusari duhet të bisedojë me Radojiçiqin. Ai u përgjigj duke thënë se “ajo është një situatë e montuar”.
Sipas tij, trysnia do duhej të jetë në Kosovë që të ngrihet aktakuzë.
“Ajo është një situatë e montuar dhe Millan Radojiçiq këtë muaj i bënë 9 muaj që ndodhet i lirë në Serbi dhe trysnia do duhej të ishte që në Kosovë të ketë aktakuzë dhe të arrestohet”, tha ai.
Kur u pyet nga gazetarët nëse do të marrë masa ndaj Kusarit, Kurti tha se Mimoza Kusari- Lila nuk është anëtare e VV’së.
Sipas tij, edhe nëse do të ishte, në Vetëvendosje ka komisione që merren më këto.
“Po e kuptoj që po përpiqeni të dramatizoni me çdo kusht disa sekonda prej një bisede që nuk e di si është marrë e ku është marrë, e si u pre e nga kush u organizua. Por edhe një herë, unë jam kryetar i VV’së dhe Mimoza Kusari nuk është anëtare e Lëvizjes Vetëvendosje. Edhe po të ishte anëtare e VV’së, për këso gjërash ka komisione brenda Lëvizjes Vetëvendosje. Nuk e ka Vetëvendosja kryetarin diktator që merr vendime siç do të kishte dëshiruar ndokush”, tha Kurti
Biseda e publikuar nga Gazeta Nacionale:
Simiq: “Kolege, kemi ardhur te Milani, dëgjohu me të”
Kusari- Lila: “Në rregull”
Radojiçiq: “Alo, (vendase) zemlajke, a po nihemi?”
Kusari- Lila: “Po, po të dëgjoj”.
Radoiçiq: “Qysh je? Qysh po kalon?
Kusari-Lila: “Qe, qe në Kuvend i kam pasur disa takime. Tash u lirova, po shkoj në shtëpi”.
Radojiçiq: “A mirë mirë”.
Sipas Nacionale biseda besohet se është zhvilluar në qershor të vitit 2022 dhe ishte në kohën kur Milan Radoiçiqi ishte përfshirë në Listën e Zezë
