“Pse të bartim këtë barrë të rëndë e të neveritshme, kur na fisnikërojnë virtyte të tjera të larta nga tradita, si besa, bujaria, mikpritja, gajreti, pra, plagën e gjakmarrjes – ta zhdukim” – Anton Çetta.
Kjo ishte filozofia prapa lëvizjes popullore për pajtimin e gjaqeve – e cila, 33 vjet më parë, me 1 maj 1990, organizoi tubimin madhështor te Verrat e Llukës, në Deçan, si një ndër ngjarjet më të rëndësishme në historinë e Kosovës së fundkshekullit XX.
Kjo lëvizje popullore në krye me profesorin dhe atdhetarin Anton Çetta u bë pikë kthese për bashkim e unitet mbarëshqiptar, duke i dhënë fund gjakmarrjes, vëllavrasjes dhe ngatërresave mes vete, për t’u mbledhur rreth një qëllimi më madhor e jetik, që ishte lufta për liri.
Mirënjohje e përjetshme për të gjithë ata veprimtarë, patriotë e intelektualë, që u bënë bashkë për Kosovën në këtë nismë për paqe vëllazërore!
