Nisja e sezonit veror ka sjellë edhe një mori masash për subjektet dhe operatorët turistik, me qëllim garantimin e jetës dhe qetësisë për pushuesit.
Jo më larg se dy ditë më parë, policia ka zhvilluar një aksion në liqenin e Komanit duke bllokuar 13 varka artizanale dhe 1 traget, që ishin në dispozicion të turistëve, me arsyetimin se nuk përmbushnin kushtet e sigurisë dhe dokumentacionet e nevojshme.
Ky veprim bëri që banorët e fshatrave përreth të dalin në protestë duke bllokuar hyrjen e tunelit të hidrocentralit. Sipas tyre kjo është e vetmja mundësi që ata të punojnë gjatë sezonit veror dhe bllokimi i tyre ka dëmtuar ekonominë e shumë familjeve.
Operatorët turistikë të liqenit të Komanit dhe lumit të Shalës zhvilluan gjithashtu një takim më kryebashkiakun e Vaut të Dejës, Kristian Shkreli, i cili ky i fundit u shpreh se nuk kishte asnjë informacion në lidhje me këtë aksion të policisë dhe se problematikën do e dërgojë te kryeministri Edi Rama.
