Data 24 shtator 2023 ishte një tragjedi për Kosovën, sepse pas një akti terrorist nga serbë të armatosur një polic i Kosovës mbeti i vrarë dhe një tjetër u plagos.
Në këtë situatë pritej edhe reagimi i bashkësisë ndërkombëtare e veçanërisht emisarëve evropianë, që ndërmjetësojnë dialogun Kosovë-Serbi, pra Mirosllav Lajçak dhe Joseph Borrell.
Të dy përmes një reagimi të shkurtër dënuan aktet e dhunës në veri dhe bënë thirrje që dialogu të vazhdohet.
Por, akuza ndaj Lajçakut ka adresuar deputeti i LVV-së Dimal Basha, i cili tha se ai po ia mban anën Serbisë.
Madje Basha thotë se edhe pas tensioneve të djeshme, ai vazhdon të qëndrojë i palëkundur ndaj masave sanksionuese që i janë vendosur Kosovës nga BE-ja.
“Lajçaku vazhdon me qëndru pas masave ndaj Kosovës, kurse nuk do asnjë masë ndaj shtetit kriminel të Serbisë dhe Escobari vazhdon me na tregu se si nuk sheh asnjë dëshmi që Lajçaku po ia mban anën Serbisë!”, thuhet në reagim.