Tregjet financiare reaguan me lëkundje të forta pas sulmeve të ndërmarra nga SHBA dhe Izraeli ndaj Iranit gjatë fundjavës, duke shtyrë çmimet e arit në rritje të ndjeshme dhe duke rikthyer frikën për një krizë të zgjatur në Lindjen e Mesme.
Çmimet globale të arit u rritën me më shumë se 2% të hënën, ndërsa investitorët u drejtuan masivisht drejt aktiveve të sigurta përballë përshkallëzimit të tensioneve gjeopolitike. Deri në orën 10:15 paradite, çmimi i arit arriti në 5,406 dollarë për ons, një rritje prej 2.44% brenda ditës.
Ekspertët theksojnë se ari konsiderohet tradicionalisht si një strehë e sigurt në kohë pasigurie, sidomos gjatë konflikteve ushtarake apo krizave të mëdha ndërkombëtare. Përshkallëzimi i situatës mes SHBA-së, Izraelit dhe Iranit ka shtuar ndjeshëm nervozizmin në tregjet globale.
Rritje shënuan edhe metalet e tjera të çmuara. Argjendi u ngjit me 2.05%, duke arritur në 95.8 dollarë për ons, ndërsa investitorët kërkojnë të diversifikojnë portofolet për të minimizuar rrezikun.
Një faktor kyç që po mban tregjet në tension mbetet situata në Ngushticen e Hormuzit, një nga korridoret më të rëndësishme energjetike në botë. Çdo mbyllje efektive e kësaj ngushtice, përmes së cilës kalon një pjesë e konsiderueshme e furnizimit global me naftë, mund të shkaktojë tronditje të reja në çmimet e energjisë dhe të thellojë paqëndrueshmërinë financiare në ditët në vijim.
Analistët paralajmërojnë se nëse tensionet vijojnë të përshkallëzohen, ari mund të vazhdojë trendin rritës, ndërsa tregjet do të mbeten të ndjeshme ndaj çdo zhvillimi të ri nga rajoni.
