Zgjedhjet e dhjetorit ishin legjitime, tha kryeministrja Ana Bërnabiq në një dalje të drejtpërdrejtë televizive, në përgjigje të thirrjeve të opozitës, komunitetit ndërkombëtar dhe Parlamentit Evropian për të nisur një hetim ndërkombëtar, duke shtuar se një iniciativë e tillë do të cenonte sovranitetin e Serbisë.
Zgjedhjet e dhjetorit u dënuan gjerësisht nga politikanë vendas dhe ndërkombëtarë, vëzhgues, qytetarë, organizata dhe shoqëria civile, si dhe nga një rezolutë e Parlamentit Evropian.
Ka pasur raporte për blerje votash, presion mbi votuesit dhe transferime të serbëve nga vendet e tjera për të votuar, por qeveria serbe, e cila fitoi votën, pohon se nuk kishte asgjë të çuditshme.
“Asnjë votë nuk është vjedhur. Nuk kaloi asnjë mizë, e lëre më nëse ishte vjedhur ndonjë gjë”, tha Bërnabiq për Prva.
“Zgjedhjet e përsëritura janë opsioni më real për Beogradin. Nuk është çështja e shumicës, ne kemi shumicën, por presidenti Aleksandar Vuçiq ka vendosur një standard: matematika nuk është politikë”, tha ajo.
Një hetim ndërkombëtar “do të pezullonte institucionet dhe ligjin në Serbi”.
“Me sa duket, Parlamenti Evropian nuk mjafton më, tani ata i drejtohen Komisionit Evropian për të fantazuar se si duhet të jetë hetimi. Opozita nuk dëshiron vetëm ta fshijë apo shkelë sovranitetin tonë, por dëshiron të pezullojë institucionet dhe ligjin kombëtar”, tha Bërnabiq, përcjell Informim.
“Unë kurrë nuk do të lejoj një hetim ndërkombëtar, sepse kjo do të kërkonte anulimin e sovranitetit të një vendi. Do të pezullonte parlamentin, institucionet, demokracinë dhe do të përfundonte duke sjellë të huajt në pushtet”, theksoi ajo.
““Si mundet dikush ta kundërshtojë shtetin e tij duke kërkuar informacion për çdo bazë të dhënash, që Ministria e Punëve të Brendshme t’i bëjë të aksesueshme të gjitha të dhënat dhe të huajt të kërkojnë kontrolle të tilla si numërimi se sa njerëz jetojnë në një apartament apo shtëpi? “, shkruan EURACTIV.rs/Informim
