Policia e Kosovës ka dhënë detaje për grabitjen e një këmbimoreje që ndodhi të mërkurën pasdite në Prishtinë, ku edhe është arrestuar i dyshuari.
Sipas organeve të rendit, i dyshuari ka gjuajtur me armë kallashnikov, AK-47, derisa si reagim në përpjekje për ta ndaluar grabitjen, edhe një qytetar ka shtënë me armë zjari.
“Sot rreth orës 15:15, është raportuar për një rast grabitje në një këmbimore në lagjen Tophane në Prishtinë, me ç’rast i dyshuari ka shtënë me armë zjarri AK-47. Si reagim ndaj të shtënave të të dyshuarit, në përpjekje për të parandaluar grabitjen një qytetar po ashtu ka shtënë me armë zjarri. Pas marrjes së informacionit, zyrtarët e Policisë së Rajonit të Prishtinës kanë dalë në vendngjarje, kanë ndërrmarrë të gjitha masat e nevojshme operativo-policore dhe pak minuta pas raportimit të rastit, kanë arritë që në Obiliq të arrestojnë personin dyshuar i cili është i lënduar”, thuhet në njoftimin e Policisë.
Po ashtu, sipas Policisë, të dyshuarit i është konfiskuar një veturë dhe arma e përdorur.
