Kryeministri në detyrë, njëherësh kryetar i Lëvizjes Vetëvendosje Albin Kurti priti në takim ministrin në detyrë të Administrimit të Pushtetit Lokal, njëherësh kryetar i partisë Iniciativa e Re Demokratike e Kosovës (IRDK), Elbert Krasniqi, ku diskutuan mbi formimin e qeverisë së re.
Në njoftimin e qeverisë në detyrë, thuhet se ky takim ishte pjesë e konsultimeve të cilat po zhvillohen nga kryeministri në detyrë me partitë politike të pakicave, pas zgjedhjeve të 9 shkurtit. P
rezent në takim ishte dhe deputeti e anëtari i partisë IRDK, Fridon Lala.
Kurti falënderoi ministrin në detyrë Elbert Krasniqi për bashkëpunimin e ngushtë gjatë këtij mandati qeverisës dhe punën e zhvilluar.
Ndërsa, kryetari i IRDK-së Elbert Krasniqi konfirmoi gatishmërinë e plotë për vazhdimin e këtij bashkëpunimi të frytshëm dhe mbështetjen ndaj kryeministrit në detyrë për formimin e qeverisë së re.
Gjatë ditës Albin Kurti ka bërë të ditur se ka filluar konsultimet me komunitetet jo shumicë për formimin e qeverisë së re.
Ai tha të mërkurën se ka takuar kryetaren e Partia e Re Demokratike (NDS) nga komuniteti boshnjak, Emilija Rexhepi dhe kryetarin e Partisë për Liri, Drejtësi dhe Mbijetesë nga komuniteti serb, Nenad Rashiq.
Kurti bëri të ditur se shumë shpejt do t’i zhvillojë takime edhe me të tjerët, por pa specifikuar nëse një gjë e tillë do të ndodhë edhe me ndonjë prej partive shqiptare që ka siguruar ulëse në Kuvend.
Kurti nuk ka komentuar arsyet se pse këto takime po i zhvillon në Zyrën e Kryeministrit dhe jo në atë të partisë.
Kujtojmë, Lëvizja Vetëvendosje ka fituar zgjedhjet parlamentare të 9 shkurtit, me 42.3 për qind. E dyta renditet, PDK me 20.95 për qind, pasuar nga LDK 18.27 për qind dhe koalicioni AAK-Nisma 7.06 për qind. Në bazë të këtyre shifrave, Lëvizja Vetëvendosje do t’i ketë 48 deputetë, PDK 24, LDK 20, AAK-Nisma 8, dhe komunitetet jo shumicë 20 ulëse të rezervuara.
Kujtojmë, kryeministri në detyrë gjatë vizitës në Bashkësinë Islame me rastin e Fitër Bajramit më 31 mars, kishte thënë se në seancën konstituive të Kuvendit të Kosovës më 15 prill, synojnë betimin e deputetëve, zgjedhjen e kryetarit dhe kryesisë, si dhe votimin e Qeverisë
