Prishtinë – Kryeministri në detyrë i Republikës së Kosovës, Albin Kurti, zhvilloi sot një takim zyrtar me ambasadorin e sapoemëruar të Italisë në Kosovë, Maurizio Antonini. Ky ishte takimi i parë ndërmjet dy zyrtarëve, në të cilin Kurti e uroi ambasadorin për marrjen e detyrës së re dhe i shprehu mirëseardhje në Kosovë.
Në njoftimin zyrtar të Zyrës së Kryeministrit, thuhet se gjatë bisedës u theksua partneriteti i fortë dhe historik ndërmjet Kosovës dhe Italisë, me theks të veçantë në kontributin e vazhdueshëm të Italisë për paqen dhe stabilitetin në vend, sidomos përmes pranisë së saj në misionin e NATO-s, KFOR.
“U diskutua gjithashtu për nevojën dhe mundësitë për thellimin e mëtejmë të bashkëpunimit bilateral, me fokus në fushën e ekonomisë, sigurisë e mbrojtjes dhe shkëmbimeve kulturore,” thuhet në njoftim.
Kryeministri Kurti e falënderoi ambasadorin Antonini për mbështetjen e Italisë ndaj aspiratave euroatlantike të Kosovës, duke vlerësuar rolin e saj si një nga mbështetëset më të fuqishme të integrimit ndërkombëtar të vendit.
Ambasadori Antonini, nga ana e tij, ritheksoi angazhimin e Italisë për të vazhduar bashkëpunimin me institucionet kosovare dhe për të forcuar lidhjet dypalëshe në të gjitha fushat me interes të përbashkët.
Takimi u zhvillua në një atmosferë miqësore dhe konstruktive, duke shënuar një hap të rëndësishëm drejt avancimit të marrëdhënieve mes dy shteteve, në një kohë kur Kosova po punon intensivisht drejt forcimit të pozitës së saj ndërkombëtare dhe integrimit në strukturat euroatlantike.
