Cristiano Ronaldo dhe zakoni i pazakontë që lidhet me higjienën e këmbëve Cristiano Ronaldo, një nga sportistët më të disiplinuar në botë, ka tërhequr sërish vëmendjen, këtë herë për një detaj paksa të veçantë: lyerjen e thonjve të këmbëve.
Sipas gazetës gjermane BILD, 39-vjeçari e praktikon këtë zakon për arsye higjienike dhe mbrojtëse, me qëllim shmangien e baktereve dhe kërpudhave që mund të zhvillohen nga djersa në këpucë apo çizme sportive.
Ky veprim, i cili mund të duket i pazakontë për publikun, është një strategji e mirëmenduar për mbrojtjen e shëndetit të tij dhe ruajtjen e formës optimale.
Kjo praktikë nuk është e rrallë mes sportistëve profesionistë, veçanërisht në disiplina si boksi, MMA dhe atletika.
Emra të njohur si Mike Tyson dhe Israel Adesanya e kanë përfshirë këtë zakon në rutinën e tyre për të përmirësuar performancën dhe për të shmangur problemet me këmbët.
Përveç kujdesit të tij ndaj higjienës, Ronaldo është i njohur për përkushtimin ekstrem ndaj formës fizike.
Ai përdor unazën inteligjente Oura Ring për të monitoruar parametra të rëndësishëm si gjumi, temperatura e trupit dhe ritmi i zemrës, duke synuar optimizimin e performancës.
Edhe në prag të 40-vjetorit të tij, Ronaldo vazhdon të shkëlqejë në fushë, duke dëshmuar se me përkushtim dhe kujdes maksimal ndaj detajeve, suksesi është i garantuar.
Ai mbetet një model frymëzimi për sportistët e rinj dhe për këdo që vlerëson disiplinën dhe përkujdesjen ndaj mirëqenies personale.
