Forca e Sigurisë së Kosovës ka bërë të ditur se Togeri Qëndrim Imeraj ka përfunduar me sukses Kursin Bazë për Oficerët e Këmbësorisë në Shkollën e Këmbësorisë “Manoeuvre Center of Excellence”, në Fort Benning, Georgia, SHBA.
Sipas njoftimit, për shkak të rezultateve të larta të treguara gjatë trajnimit, Imeraj është dekoruar me çmimin “Distinguished Honor Graduate”, që u jepet studentëve me arritje të shkëlqyera në të gjithë komponentët e kursit.
“Ky sukses përfaqëson jo vetëm përkushtimin personal të toger Imerajt, por edhe profesionalizmin dhe cilësinë e lartë të oficerëve të Forcës së Sigurisë së Kosovës, të cilët po arrijnë suksese në nivel ndërkombëtar”, thuhet në njoftim.
Ky kurs është një nga programet themelore të trajnimit për oficerët e këmbësorisë, i cili përfshin përgatitje të avancuar në fusha të ndryshme si:
Taktikat e operacioneve tokësore në nivel togu dhe kompanie
Lidership ushtarak dhe vendimmarrje në kushte stresuese
Trajnim fizik intensiv
Menaxhimi i burimeve dhe logjistikës në fushë
Teknikat e komunikimit dhe komandimit në operacione të përbashkëta dhe ndërkombëtare
Ky sukses është një dëshmi e angazhimit të vazhdueshëm të FSK-së për ngritjen e kapaciteteve profesionale dhe përfaqësimin dinjitoz të Kosovës në arenën ndërkombëtare.
