Ish-deputetja e LDK-së, Melihate Tërmkolli, ka reaguar ndaj deklarimeve të presidentes Vjosa Osmani, e cila tha se gjyqtari Radomir Llaban paraqet kërcënim për sigurinë kombëtare të Kosovës.
Përmes një postimi në Facebook, Tërmkolli ka vënë në pikëpyetje nëse për vendin është më e rrezikshme vetë Presidentja Osmani apo Llaban. Ajo ka theksuar se nëse presidentja ka pasur informacione zyrtare për rrezikshmërinë e Llabanit, ai është dashur të arrestohet menjëherë.
Sipas Tërmkollit, Presidentja Osmani dhe kryeministri Albin Kurti janë shkatërruesit më të mëdhenj të rendit kushtetues dhe sigurisë kombëtare, duke i cilësuar veprimet e tyre si “puç” që prej zgjedhjeve e deri në ditët e fundit. Ajo i akuzon se për pushtet, janë të gatshëm të shkelin mbi çdo parim.
Në fund, Tërmkolli shton se, në mungesë të funksionimit të institucioneve të shtetit, organet e sigurisë duhet të ndërhyjnë për të rikthyer rendin kushtetues, pasi sipas saj “këta fëmijaqë të rrezikshëm nuk njohin gjuhë tjetër”.
