Në gjashtë muajt e parë të vitit 2025, Policia e Tiranës ka regjistruar 219 raste të mashtrimeve kompjuterike, duke treguar një rënie të lehtë krahasuar me të njëjtën periudhë të vitit të kaluar. Megjithatë, sfida me krimet kibernetike mbetet serioze, pasi vetëm 26 persona janë arrestuar, ndërsa 108 të dyshuar janë ende në kërkim.
Në total, për periudhën janar-qershor janë proceduar 249 persona, ndërsa numri i autorëve të dyshuar në vitin 2024 ishte shumë më i lartë, rreth 381. Në këtë kontekst, Policia e Tiranës dhe Divizioni për Krimin Kibernetik njoftojnë se çdo ditë pranojnë të paktën dy denoncime nga qytetarë që kanë rënë viktimë e mashtrimeve online, me ditë kur ky numër është edhe më i madh.
Rrjeti i mashtruesve vazhdon të operojë aktivisht, duke alarmuar autoritetet për nevojën e forcimit të masave kundër krimeve kibernetike në kryeqytet.
