Pas dështimit të 55-të për konstituimin e Kuvendit të Kosovës, kryetari i PDK-së, Memli Krasniqi, ka artikuluar një qëndrim të ashpër ndaj kandidatëve të propozuar nga Lëvizja Vetëvendosje, duke e bërë të qartë se partia e tij nuk do të mbështesë asnjë figurë që ka qenë pjesë e Qeverisë Kurti.
“Nuk ka vota për Albulena Haxhiun, nuk ka vota as për ministra,” deklaroi Krasniqi, duke i dhënë fund çdo iluzioni për kompromis të shpejtë. Ai kritikoi edhe mënyrën e menaxhimit të seancës nga kryesuesi Avni Dehari, duke e cilësuar mbylljen e saj si të paqartë dhe të paarsyetuar.
“Kemi një rikthim te pika ku kemi qenë, e nga ku nuk është dashur të largohemi asnjëherë,” shtoi ai, duke nënvizuar se Vetëvendosje po e zvarrit procesin me kandidatura të papranueshme për opozitën.
PDK ka ofruar publikisht një kompromis: të votojë një kandidat nga radhët e LVV-së, por vetëm nëse ai nuk ka qenë pjesë e ekzekutivit të kaluar. “Është një qëndrim që e kemi ofru pa na e kërku,” tha Krasniqi, duke e paraqitur partinë e tij si konstruktive, por të vendosur.
Ky pozicionim i prerë e zhyt edhe më tej Kuvendin në ngërç, duke e bërë të pamundur zgjedhjen e kryetarit pa një ndryshim strategjik nga ana e Vetëvendosjes. Me afatet kushtetuese që afrohen dhe tensionet që rriten, bllokimi institucional po kthehet në krizë të hapur politike.
