Ish-Kryetari i Gjykatës Kushtetuese të Kosovës, Enver Hasani, ka reaguar ndaj zhvillimeve të fundit në Kuvendin e Kosovës, duke deklaruar se konstituimi i tij nuk mund të konsiderohet i përmbyllur pa zgjedhjen e plotë të nënkryetarëve, përfshirë edhe përfaqësuesin nga komuniteti serb.
Deklarata e Hasanit vjen pas shpalljes së kryetarit të Kuvendit, Dimal Basha, i cili njoftoi se seanca konstitutive ishte përmbyllur, pavarësisht mungesës së zgjedhjes së një nënkryetari nga komuniteti serb.
“Ky veprim është në kundërshtim me Kushtetutën, Rregulloren e Kuvendit dhe aktgjykimet e mëparshme të Gjykatës Kushtetuese,” tha Hasani për “Koha.net”, duke theksuar se rendi kushtetues po shpërfillet në mënyrë të rrezikshme.
Sipas tij, pengesat që lidhen me rendin e ditës dhe pamundësia për kandidimin e përfaqësuesit serb përbëjnë shkelje të qartë të procedurave parlamentare dhe parimeve të përfaqësimit të barabartë.
Hasani paralajmëroi për pasoja të mundshme në arenën ndërkombëtare, duke nënvizuar se veprime të tilla mund të dëmtojnë kredibilitetin institucional të Kosovës dhe raportet me partnerët ndërkombëtarë.
“Shpërfillja e rendit kushtetues nga udhëheqësit e Kuvendit dhe partia e tyre është alarmante. Kjo nuk është thjesht çështje teknike, por një krizë e funksionimit demokratik,” përfundoi Hasani.
Kjo situatë po ngjallë debat të gjerë në opinionin publik dhe mes ekspertëve kushtetues, duke ngritur pikëpyetje serioze mbi legjitimitetin e procesit të konstituimit dhe respektimin e normave demokratike në institucionin më të lartë përfaqësues të vendit.
