Ish-kryetari i Gjykatës Kushtetuese, Enver Hasani, ka komentuar raportet mes Kosovës dhe Shteteve të Bashkuara të Amerikës, duke e ndërlidhur këtë temë me qëndrimet ideologjike të kryeministrit në detyrë, Albin Kurti.
Në një intervistë për “Betimi për Drejtësi”, Hasani tha se marrëdhëniet Kosovë–SHBA sot ndikohen nga dy faktorë: gjendja e përgjithshme e politikës ndërkombëtare dhe roli i Amerikës në të, si dhe profili psikologjik e ideologjik i kryeministrit Kurti.
Sipas tij, Kurti është “anti-imperialist i ekstremit të majtë”, dhe ky pozicion lidhet drejtpërdrejt me bindjet e tij politike.
“E kam përcjellë prej kohësh Kurtin, e kam lexuar dhe e njoh nga afër. Zoti Kurti është anti-imperialist i ekstremit të majtë, mbi të gjitha me një bindje anti-amerikane. Ai dhe një rreth njerëzish të afërt i kanë kultivuar këto ide nga literatura që lexojnë dhe diskursi që zhvillojnë”, tha Hasani.
Megjithatë, sipas tij, Kurti i ka fshehur këto qëndrime për shkak të sentimentit pro-amerikan të shumicës së qytetarëve të Kosovës.
“Ky i takon një rryme të majtë, por këtë bindje e ka mbajtur të fshehur që nga ardhja në pushtet për të ruajtur votat. Politikisht kjo është e pranueshme, por ideologjia ka kufijtë e vet”, theksoi Hasani.
Rugova dhe Kurti, “nata me ditë”
Hasani bëri edhe një krahasim mes ish-presidentit Ibrahim Rugova dhe kryeministrit në detyrë, duke e përshkruar dallimin mes tyre si “diametralisht të kundërt”.
“Rugova ishte intelektual i jashtëzakonshëm, i pakrahasueshëm me Kurtin. Veprat e tij reflektojnë një formim liberal-racional të frymëzuar nga doktrina e Revolucionit Francez, të cilën e kishte specializuar gjatë qëndrimit në Francë”, tha ai.
Në të kundërt, sipas Hasanit, Kurti ka formim të kufizuar në shkencat shoqërore.
“Dija e tij është sipërfaqësore, më shumë për të impresionuar të tjerët se sa e thelluar. Shpesh duket si dije ‘Wikipedike’, pa bazë sistemike”, u shpreh ai.
Kujtimi për senatorin Bob Dole
Duke kujtuar vitet e ’90-ta, Hasani foli edhe për rolin e senatorit amerikan Bob Dole, të cilin e quajti “Engjëlli Gabriel” për shqiptarët e Kosovës.
Ai tha se vizita e Dole në Kosovë solli një mesazh të qartë për Serbinë, por edhe për lidershipin e Kosovës në atë kohë.
“Senatori Dole dha sinjal se demokracia do të vinte në Kosovë, deshën apo s’deshën strukturat e Beogradit. Ai ishte mesazh i fuqishëm për të gjithë, mesazh që u përputh më vonë edhe me qëndrimet e diplomatëve kryesorë amerikanë”, kujtoi Hasani.
Në fund, Hasani theksoi se marrëdhëniet e Kosovës me SHBA-të mbeten jetike, por se këto raporte ndërlidhen ngushtë si me dinamikën globale, ashtu edhe me orientimet ideologjike të udhëheqësve vendorë.
