Ish-kapiteni i Anglisë, John Terry, ka lavdëruar formën e jashtëzakonshme të Jude Bellinghamit në Kupën e Botës, duke e krahasuar yllin e Real Madridit me legjendën franceze Zinedine Zidane.
Megjithatë, ish-mbrojtësi i Chelseat ka paralajmëruar se shkëlqimi individual i Bellinghamit mund të mos mjaftojë, nëse Anglia e Thomas Tuchelit nuk arrin t’i neutralizojë yjet e Norvegjisë në çerekfinale.
Terry: Te Jude shoh shenja të Zidane
Terry ka mbetur i mahnitur nga paraqitjet e Bellinghamit në këtë Botëror, sidomos pas fitores dramatike 3-2 të Anglisë ndaj Meksikës në stadiumin “Azteca”, ku mesfushori anglez shënoi dy gola.
Duke folur në “Piers Morgan Uncensored”, Terry tha se 23-vjeçari i kujton Zinedine Zidanen.
“E patë Jude mbrëmë. E krahasova me Zinedine Zidane dhe ndoshta isha pak ambicioz, por shikojeni atë ndeshje dhe atë që po bën. Ai është i pabesueshëm. Dy golat e tij e kompletuan paraqitjen për mua, ndërsa edhe pasimi i Harry Kane për golin e dytë ishte fantastik”, deklaroi Terry.
Liderët e Anglisë në momentin vendimtar
Edhe pse Bellingham po merr vëmendjen kryesore, Terry beson se forca e vërtetë e Anglisë qëndron te bërthama e skuadrës dhe te liderët që po e udhëheqin ekipin drejt fazave të fundit të turneut.
Sipas tij, disa lojtarë janë të pazëvendësueshëm për ambiciet e “Tre Luanëve”.
“Ata nuk guxojnë të lëndohen dhe duhet të jenë në qendër të suksesit tonë. Pa këta lojtarë që e shtyjnë skuadrën përpara dhe vendosin standardet, gjithçka bëhet më e vështirë. Ka liderë në grup. Harry Kane, këtë e kemi parë gjatë gjithë karrierës së tij. Jude Bellingham, në një moshë kaq të re, po e bën tashmë këtë. Declan Rice, dhe këtu e përfshij edhe Reece Jamesin”, tha Terry.
Rreziku quhet Martin Odegaard
Pavarësisht euforisë pas fitores ndaj Meksikës, Anglinë e pret një përballje shumë e vështirë në çerekfinale kundër Norvegjisë.
Terry është i bindur se çelësi i suksesit për Anglinë do të jetë ndalja e Martin Odegaardit, kapitenit të Arsenalit dhe trurit të lojës së Norvegjisë. Mesfushori ishte vendimtar edhe në fitoren befasuese të Norvegjisë ndaj Brazilit më herët në turne.
“Norvegjia është skuadër e mirë. Janë shumë të organizuar. Mendoj se gjithçka e mirë në atë ekip kalon përmes Martin Odegaardit. Nëse Anglia arrin ta ndalë atë dhe Erling Haalandin, atëherë kemi një mundësi shumë, shumë të madhe”, paralajmëroi Terry.
Si mund të ndalet Haaland?
Por ndalja e Odegaardit është vetëm një pjesë e sfidës. Erling Haaland vazhdon të frikësojë mbrojtjet kundërshtare, me shtatë gola në vetëm katër ndeshje, duke qëndruar në krye të garës për “Këpucën e Artë” përkrah Lionel Messit dhe Kylian Mbappes.
Terry, i njohur si një nga mbrojtësit më të fortë të gjeneratës së tij, dha disa këshilla të drejtpërdrejta për Marc Guehi dhe Ezri Konsa se si duhet të sillen ndaj sulmuesit të Manchester Cityt. Ai përmendi edhe gabimet e Gabriel Magalhaes si një mësim që Anglia duhet ta ketë parasysh.
“Është e vështirë, sepse ai mund të të sulmojë menjëherë pas shpine. Është shumë i fuqishëm dhe shumë i shpejtë, prandaj duhet të jesh gjithmonë i vetëdijshëm për këtë. Kush tjetër është në zonë? Një apo dy lojtarë të tjerë, por ata nuk janë kërcënim aq i madh sa Haaland”, tha Terry.
“Kushdo që e markon Haalandin në zonë, duhet të qëndrojë shumë afër tij, të jetë plotësisht i fokusuar dhe, në njëfarë mënyre, egoist në atë duel. Duhet ta nxjerrë nga loja, sepse në çdo moment ai mund të të ndëshkojë. Harry Kane e bën këtë, të gjithë sulmuesit më të mirë e bëjnë, por Haaland ndoshta e bën më mirë se kushdo tjetër”, shtoi ai.
Anglia hyn në çerekfinale me vetëbesim të madh pas fitores historike ndaj Meksikës, por përballë Norvegjisë do t’i duhet shumë më tepër se frymëzim individual. Nëse Bellingham është magjia e skuadrës, ndalja e Odegaardit dhe Haalandit mund të jetë çelësi që hap rrugën drejt gjysmëfinales.
