Kompanitë e sigurimeve mund të anulojnë policat e sigurimit për anijet që paguajnë tarifa kalimi Iranit ose ndonjë shteti tjetër, njoftoi të enjten një organizatë e madhe e industrisë, duke shtuar një tjetër shtresë pasigurie mbi situatën e ndërlikuar të tregut të naftës të shkaktuar nga lufta me Iranin, raporton CNN.
Shoqata e Tregut Lloyd’s (Lloyd’s Market Association – LMA), që përfaqëson agjentët nënshkrues të sigurimeve detare, tha se në një klauzolë të re të hartuar për policat e sigurimit të anijeve, pagesa e një tarife kalimi Iranit, drejtpërdrejt ose përmes ndonjë agjenti të tij, është e paligjshme. Nëse anijet e paguajnë këtë tarifë, kjo mund ta bëjë të pavlefshme të gjithë policën e sigurimit të anijes.
“Sipas kësaj klauzole, siguruesit nuk kanë asnjë detyrim të kompensojnë një pagesë të tillë dhe, në rast se një pagesë e tillë është bërë, lirohen nga detyrimet që lidhen me anijen përkatëse”, tha LMA në një deklaratë.
LMA tha se siguruesit mund të zbatojnë një politikë të përgjithshme për tarifat e kalimit, në mënyrë që agjentët të mos kenë nevojë të përcaktojnë se kush do t’i marrë përfundimisht paratë. Kjo mund të përfshijë edhe Shtetet e Bashkuara, pasi presidenti Donald Trump pati sugjeruar për një kohë të shkurtër se edhe SHBA-ja mund të vendoste tarifa të tilla, përpara se të hiqte dorë nga ai plan.
Megjithatë, klauzola e LMA-së është vetëm një udhëzim dhe agjentët apo kompanitë e transportit detar mund t’i hartojnë policat sipas gjykimit të tyre.
Megjithatë, kjo mund ta ndërlikojë ndjeshëm situatën tashmë të komplikuar në Ngushticën e Hormuzit: Irani ka qëlluar ndaj anijeve që përpiqen të hyjnë ose të dalin nga Gjiri Persik duke ndjekur vijën bregdetare të Omanit. Irani dëshiron që anijet ta kalojnë ngushticën pranë bregdetit të tij, në mënyrë që t’i regjistrojë dhe t’u vendosë tarifa kalimi.
Por Shtetet e Bashkuara dhe vende të tjera kanë vendosur sanksione ndaj Iranit, kështu që kryerja e biznesit me regjimin iranian do të përbënte shkelje të ligjit, tha LMA.
Kjo i lë kompanitë e transportit detar me shumë pak alternativa të favorshme – veçanërisht pasi Huthët kanë shpallur bllokadën e Ngushticës Bab al-Mandeb, duke lënë shumë pak rrugë të mbetura që nafta nga Lindja e Mesme të arrijë te blerësit e saj.
