Mediumi francez “France 24”, ka shkruar për protestën e 1 tetorit në Prishtinë.
Mijëra protestues dolën në rrugë kundër verdiktit të Gjykatës Speciale që dënoi ish-krerët e luftës me burgim.
Mediumi francez ka informuar publikun për situatën, vizitën e Presidentes së Komisionit Evropian, Ursula von der Layen.
Artikulli i plotë i përkthyer në shqip:
Mijëra njerëz protestuan të enjten në Kosovë kundër dënimeve për krime lufte ndaj ish-presidentit Hashim Thaçi, ndërsa shefja e BE-së, Ursula von der Leyen, bëri thirrje për respektim të gjykatës gjatë një vizite në Prishtinë.
Një sërë protestash janë mbajtur në Kosovë që kur Thaçi u dënua muajin e kaluar me 25 vjet burg për krime të kryera gjatë luftës për pavarësi nga Serbia në vitet 1990.
Dhomat e Specializuara të Kosovës, me seli në Holandë, vendosën se ish-presidenti dhe tre ish-udhëheqës të tjerë të Ushtrisë Çlirimtare të Kosovës (UÇK) mbanin përgjegjësi penale për vrasje, arrestime të paligjshme, torturë dhe trajtim mizor të kryera nga luftëtarët e UÇK-së gjatë konfliktit.
Dënimet e rënda për këta burra, të cilët në vend vazhdojnë të shihen kryesisht si heronj, shkaktuan indinjatë në shtetin ballkanik.
Duke folur pas një takimi me kryeministrin e vendit, Albin Kurti, von der Leyen tha se “mandati i gjykatës duhet të respektohet plotësisht”.
“Të akuzuarit tani kanë të drejtë të apelojnë,” u tha ajo gazetarëve.
“Por një gjë është e qartë. Ky vendim ka të bëjë me përgjegjësinë individuale të të akuzuarve. Rezistenca e Kosovës nuk është në gjyq.”
Kurti më herët ka deklaruar se vendimi i gjykatës përmbante “gabime faktike, ligjore dhe historike” dhe se do t’i shqyrtonte propozimet e opozitës për ndryshimin e gjykatës.
Më herët, ndërsa von der Leyen mbërriti, transmetuesit lokalë shfaqën pamje të një grupi të vogël protestuesish që përpiqeshin të bllokonin daljen e saj nga aeroporti me një kamion dhe një autocisternë.
Duke mbajtur pankarta me mbishkrimet “BE, na keni tradhtuar” dhe “Sot Thaçi, nesër Zelensky”, ata brohoritën akronimin e UÇK-së.
Megjithatë, kolona e automjeteve të shefes së BE-së u shoqërua nën masa të rrepta policore përmes një daljeje tjetër.
Më vonë, ndërsa von der Leyen takonte me dyer të mbyllura studentët e Universitetit të Prishtinës, mijëra protestues u mblodhën gjithashtu në qendër të qytetit si pjesë e protestave të vazhdueshme kundër gjykatës.
Demonstruesit e akuzojnë gjykatën përanshmëri politike për shkak të përdorimit të provave të ofruara nga Serbia, e cila nuk e ka njohur kurrë pavarësinë e ish-provincës së saj. Thaçi u dënua së bashku me ish-figurat e larta të Ushtrisë Çlirimtare të Kosovës: Jakup Krasniqin, Rexhep Selimin dhe Kadri Veselin. Ata u dënuan me burgim që varionte nga 13 deri në 25 vjet.
