Liverpooli po kalon një fillim të vështirë të sezonit, ndërsa kritikat ndaj përforcimeve të kushtueshme të klubit po shtohen.
Pas humbjes 3-0 ndaj Manchester Cityt, vëmendja e tifozëve është përqendruar te disa prej emrave që pritej të bënin diferencën, përfshirë Florian Wirtzin dhe Bradley Barcolan.
Liverpooli ndodhet në vendin e nëntë në tabelën e Premierligës pas gjashtë ndeshjeve, ndërsa paraqitjet e fundit kanë ngritur pikëpyetje për ndikimin e lojtarëve të afruar gjatë verës që lamë pas.
Barcola, i cili iu bashkua skuadrës nga Paris Saint-Germaini për rreth 123 milionë funte, po përballet me presion të madh. Përveç pritshmërive që shoqërojnë një transferim të tillë, francezi duhet të përballojë edhe krahasimet me Mohamed Salahun, të cilin Liverpooli synon ta zëvendësojë në repartin ofensiv.
Sulmuesi anësor kishte realizuar 13 gola dhe tetë asistime sezonin e kaluar, ndërsa gjashtë kontribute në gola i kishte regjistruar në Ligën e Kampionëve, ku PSG-ja triumfoi ndaj Arsenalit në finalen e zhvilluar me penallti.
Megjithatë, kalimi në futbollin anglez nuk ka nisur sipas pritshmërive. Pas gjashtë paraqitjeve me Liverpoolin, Barcola ende nuk ka regjistruar gol apo asistim, duke shtuar shqetësimet për përshtatjen e tij me skuadrën e re.
Ish-sulmuesi anglez Michael Owen, në një intervistë për Flashscore, ka vlerësuar se francezit i duhet kohë për t’u përshtatur, duke theksuar se në këtë fazë kërkohet durim.
Premierliga, sfidë e re për Barcolan dhe Wirtzin
Vetë Barcola e ka përshkruar Premierligën si një kampionat me intensitet shumë të lartë dhe dukshëm të ndryshëm nga Ligue 1. Sipas tij, ndeshjet në Angli karakterizohen nga tranzicione të shpejta dhe lojë e vazhdueshme nga njëra portë te tjetra.
Këto ndryshime mund të kërkojnë kohë për t’u përballuar, veçanërisht për lojtarët që vijnë nga kampionate me ritëm dhe qasje taktike të ndryshme.
Një situatë e ngjashme po diskutohet edhe në rastin e Florian Wirtzit, i cili u transferua te Liverpooli nga Bayer Leverkuseni në verën e vitit 2025. Edhe mesfushori gjerman, përkundër cilësive të tij dhe pritshmërive të mëdha, është përballur me vështirësi për të dhënë ndikimin e pritur në futbollin anglez.
Të dy lojtarët përfaqësojnë një investim të madh financiar për klubin, ndaj presioni për rezultate të menjëhershme është i kuptueshëm. Kjo ka nxitur debate edhe për politikën e transferimeve të Liverpoolit, i cili ka shpenzuar shuma të konsiderueshme për futbollistë që ende nuk e kanë treguar plotësisht potencialin e tyre.
Megjithatë, paraqitjet në Ligën e Kampionëve kanë dëshmuar se Barcola dhe Wirtz kanë aftësi për të konkurruar në nivelin më të lartë evropian. Sfida për ta mbetet që këtë cilësi ta shfaqin vazhdimisht edhe në Premierligë.
Liverpooli ka nevojë për rezultate dhe nuk mund të mbështetet vetëm te potenciali i përforcimeve të reja. Për Barcolan, hapi i radhës është që shpejtësinë, driblimet dhe aftësitë individuale t’i shndërrojë në gola dhe asistime.
Durimi mund të jetë i nevojshëm, por presioni në Anfield do të vazhdojë të rritet nëse rezultatet nuk përmirësohen. Tani mbetet të shihet nëse Barcola do ta gjejë formën e tij apo do të vazhdojë të përballet me të njëjtat vështirësi si Wirtz
