Kryeministri i Kosovës, Albin Kurti, është takuar me ministrin irlandez të Shtetit për Çështjet Evropiane dhe Mbrojtjen, Thomas Byrne, në margjinat e Samitit të Liderëve të Procesit të Berlinit, që po mbahet në Mal të Zi.
Kurti e falënderoi Byrne për përkrahjen e vazhdueshme të Irlandës për Kosovën dhe për kontributin në sigurinë e vendit përmes KFOR-it.
Ai bëri të ditur se mbi 3 mijë pjesëtarë të ushtrisë irlandeze kanë shërbyer në Kosovë që nga viti 1999, ndërsa më shumë se 1 mijë refugjatë shqiptarë të luftës kishin gjetur strehim në Irlandë.
Kurti shkroi në Facebook se se me partnerët ndërkombëtarë po punohet që progresi demokratik dhe përkushtimi evropian i Kosovës të përkthehen në hapa konkretë drejt anëtarësimit në Bashkimin Evropian.
“Në këtë drejtim, biseduam për avancimin e nevojshëm të Kosovës në këtë rrugë. Muaji nëntor është i rëndësishëm dhe presim që Raporti i Komisionit Evropian të pasqyrojë progresin e arritur dhe që ky progres të marrë formë konkrete përmes marrjes së pyetësorit të Komisionit Evropian”, tha ai.
