La Liga është e shqetësuar për mundësinë e humbjes së Kinës, një prej tregjeve më të rëndësishme ndërkombëtare të saj, pas polemikave të fundit që lidhen me Kylian Mbappen.
Sipas mediumit spanjoll AS, drejtuesit e futbollit spanjoll po punojnë për të shmangur përshkallëzimin e situatës dhe pasojat e mundshme financiare për klubet.
La Liga shpreson që marrëdhëniet e saj diplomatike me Kinën dhe marrëveshjet ekzistuese të ndihmojnë në qetësimin e tensioneve. Megjithatë, ekziston frika për një bojkot të mundshëm, të ngjashëm me atë që përjetoi NBA-ja, e cila u përjashtua në masë të madhe nga tregu kinez për gati dy vjet e gjysmë.
Kina konsiderohet një prej tregjeve më të rëndësishme për La Ligën, krahas Amerikës së Veriut, ndaj humbja e këtij tregu mund të ketë pasoja të ndjeshme ekonomike për futbollin spanjoll.
Për momentin, La Liga synon të parandalojë që polemikat të ndikojnë në marrëdhëniet tregtare dhe popullaritetin e kampionatit në tregun kinez.
