Në një zhvillim të ri, gazetari Miguel Delaney nga “The Independent” raporton se Real Madridi është në mesin e tri klubeve të mëdha që po synojnë transferimin e mesfushorit të Arsenalit, Martin Zubimendi, gjatë afatit kalimtar të janarit.
Në garë për reprezentuesin spanjoll janë edhe rivali i përbetuar i madrilenëve, Atletico Madrid, si dhe Chelsea, skuadër e njohur për shpenzimet e mëdha në tregun e transferimeve.
Kjo nuk është hera e parë që Real Madridi shfaq interesim për Zubimendin. Mesfushori spanjoll ishte lidhur vazhdimisht me një transferim në “Santiago Bernabeu” edhe gjatë kohës kur ishte pjesë e Real Sociedadit.
Spekulimet u shtuan veçanërisht pas emërimit të Xabi Alonsos në krye të Real Madridit në vitin 2025, por në fund Zubimendi vendosi t’i bashkohej Arsenalit në një marrëveshje prej 60 milionë funtesh.
Pasi e nisi pozitivisht aventurën në Londër, rëndësia e tij në skuadër filloi të zbehej drejt fundit të sezonit të kaluar, në të cilin Arsenali e fitoi titullin e Premierligës.
Ardhja e Bruno Guimaraes gjatë verës, prania e vazhdueshme e Declan Rice në formacion, si dhe mundësia e aktivizimit të Myles Lewis-Skelly, kanë bërë që ylli 27-vjeçar të mos luajë aq rregullisht sa do të dëshironte.
Në fakt, ish-futbollisti i Real Sociedadit ka regjistruar vetëm 380 minuta në 12 ndeshje në të gjitha garat për Arsenalin këtë sezon.
Në këto rrethana, interesimi i Real Madridit për të ishte rikthyer që gjatë verës, veçanërisht pasi klubi madrilen nuk arriti ta transferonte Rodrin.
Tani, duket se gjiganti spanjoll është rikthyer në garë për Zubimendin para hapjes së afatit kalimtar të janarit, pasi vazhdon të kërkojë një mesfushor me cilësitë e tij.
Nga ana tjetër, Arsenali nuk do ta kundërshtonte domosdoshmërisht largimin e futbollistit, pasi po synon të përforcohet me një lojtar të ri në repartin ofensiv.
Për këtë arsye, te të dy klubet madrilene dhe Chelsea po rritet besimi se transferimi i mesfushorit mund të realizohet gjatë afatit kalimtar të dimrit.
Megjithatë, sipas raportimit, në rast të shitjes së tij, Arsenali do të kërkonte të paktën t’i rikuperonte 60 milionë funtet që kishte investuar për transferimin e tij në vitin 2025.
Pas një fillimi jo të qëndrueshëm të sezonit, Real Madridi duket se më në fund ka gjetur ekuilibrin në mesfushë, duke e përdorur Bernardo Silvan në një rol më të tërhequr dhe duke e zhvendosur Federico Valverden në pozitën e mbrojtësit të djathtë.
Megjithatë, mbetet të shihet nëse madrilenët do të ndërmarrin hapa konkretë për transferimin e Zubimendit, nëse mundësia për ta siguruar shërbimin e tij gjatë janarit bëhet reale.
