Deputetja nga Gjilani në Kuvendin e Kosovës nga radhët e Lidhjes Demokratike të Kosovës, Valentina Bunjaku – Rexhepi, ka reaguar ndaj protestës si dhe paralajmërimeve të shoqatës Handikos për ndërprerje të shërbimeve ndaj personave me aftësi të kufizuara.
Bunjaku – Rexhepi tha se protesta e mbajtur dje në Gjilan nga Handikos, ishte shumë e drejtë dhe se sipas saj, çdo bllokim financimi për këto shoqata paraqet shkelje kushtetuese.
“Protesta në Gjilan ishte shumë e drejtë dhe kërkesat të realizohen menjëherë. Çdo bllokim financimi për këto shoqata paraqet shkelje kushtetuese, shkelje për të drejtat e fëmijëve dhe të rriturve me aftësi të kufizuara”, ka shkruar ajo në rrjetin e saj social Facebook.
Deputetja fajet për këtë ia hedhë kryetarit të Komunës së Gjilanit, derisa thotë se ai duke ndjekur pushimet e veta, as nuk i takoi protestuesit.
“Kryetari i Komunës duke ndjekur pushimet e veta, as nuk i takoi protestuesit”, ka thënë ajo.
Pamjet e protestës dhe të pjesëmarrësve, deputetja thotë se nuk do t’i shohin më, duke theksuar se këtë çështje do ta adreson në Kuvendin e Kosovës.
“Do ta adresoj këtë çështje edhe në Kuvendin e Kosovës. Nuk do të lejojmë në asnjë mënyrë mbylljen e këtyre shoqatave”, ka theksuar ajo.
“Pamjet e tilla teksa protestojnë personat me aftësi të kufizuara në vapë të lartë, nuk duhet t’i shohim më”, ka shkruar tutje ajo.
Sipas saj, qeveria lokale ka dështuar në çdo aspekt dhe tash edhe në kategorinë më të ndjeshme.
“Qeverisja lokale ka dështuar në çdo projekt madhor dhe tash edhe kategorinë më të ndjeshme po e diskriminon”, ka thënë ajo, duke theksuar se kjo kategori duhet të ketë buxhet të qëndrueshëm për disa vjet.
“Handikos dhe Shoqata e të Verbërve dhe çdo shoqatë që mbron kategorinë e personave me aftësi të kufizuara, duhen të kenë buxhet të qëndrueshëm për disa vjet. Këto shoqata bëjnë punë të mrekullueshme për të ndihmuar personat me aftësi të kufizuara dhe familjarët e tyre”, ka theksuar ajo
Ajo tutje bënë thirrje për mosmbylljen e shoqatave që mbrojnë personat me aftësi të kufizuara.
“Jo mbylljes së shoqatave që mbrojnë dhe ndihmojnë personat me aftësi të kufizuara! Po financimit të rregullt, të qëndrueshëm dhe rritjes së buxhetit për këto shoqata”, ka përfunduar ajo.
Ndryshe, gjatë ditës së djeshme, shoqata Handikos në Gjilan ka mbajtur protest për t’i kujtuar kryetarit të komunës se edhe kjo kategori është pjesë e shoqërisë.
Kjo protest ka rrjedhur si pasojë e shumë kërkesave ndaj kryetarit për ndihmë, për shkak se mungesa e mjeteve financiare, sipas shoqatës Handikos ka bërë që shërbimet e tyre të ndërpriten.
Kryetari i Shoqatës Handikos, Fatmir Shurdhani, gjatë protestës ka kërkuar nga kryetari dhe t’i zbatoj vendimey e Kuvendit Komunal, sepse sipas tij këto shërbime specifike që kanë, kanë të bëjnë me rehabilitimin dhe integrimin e shoqërisë.
