Në kohën kur sytë janë kthyer kah Ndërmarrja Publike “Trepça”, shkaku i mosekzekutimit të pagave qe dy muaj për minatorët, në pah kanë filluar të dalin parregullësitë në këtë ndërmarrje. Përderisa disa herë gjatë vitit të kaluar e këtij viti minatorëve u janë vonuar pagat me javë, një minator ka qëlluar “fatlum”, meqë atij i janë ekzekutuar pothuajse tetëpaga përnjëherë gjatë vitit të kaluar,
Zyra Kombëtare e Auditimit, në raportin vjetor për këtë ndërmarrje, ka identifikuar një rast ku një punonjës ishte paguar 8 mijë e 797 euro për një muaj, ndonëse do të duhej të paguhej 1 mijë e 140 euro.
“Në një rast kemi identifikuar që punonjësi ishte paguar 8,797 euro për një muaj me pagë bruto ndërsa do të duhej të paguhet me pagë bruto në vlerë 1,140 euro. Pra, kemi një diferencë prej 7,657 euro”, thuhet në raportin e Auditorit.
Sipas ZKA’së, kishte ndodhur për shkak të mungesës së kontrolleve të brendshme. Aty nuk përmendet nëse këto para i janë kthyer më pas ndërmarrjes.
“Kjo kishte ndodhur për shkak të mungesës së kontrolleve të brendshme dhe për shkak të mos aprovimit të aktit juridik të brendshëm sipas kërkesave të rregullores 01/2019. Bordi Mbikëqyrës duhet të siguroj që kompensimet e punëtorëve janë realizuar ashtu siç kërkohet në ligjin e punës si dhe të ndërmerr hapa korrigjues për pagesën e realizuar përtej kontratës. Po ashtu Bordi Mbikëqyrës duhet të sigurojë që është përpiluar dhe aprovuar një akt i brendshëm ku është e përcaktuar forma e organizimit dhe lartësia e kompensimit për anëtarët e shpëtimit”, theksohet në raport.
Aty përmendet edhe se si një punonjës ishte emëruar Epror i lartë i skuadrave dhe kishte marrë 300 euro shtesë në muaj, ndonëse i njëjti nuk ishte trajnuar dhe nuk posedonte certifikatën përkatëse.
“Ne kemi kërkuar dëshmi lidhur me vlerën e shtesës së kompensimit mirëpo ndërmarrja nuk ka arritur të na siguroj bazën ligjore. Për më tepër, me këtë vlerë prej 300 euro ishin kompensuar edhe anëtarët e tjerë të Çetës së Shpëtimit”, thuhet në raport.
