Gjykata Kushtetuese ka shpallur vendimin lidhur me ankimin e ish-kryeministrit Sali Berisha mbi masat e sigurisë të vendosura nga Prokuroria e Posaçme Kundër Korrupsionit dhe Krimit të Organizuar (SPAK).
Në fokus të vendimit ishin dy masat: “detyrim për t’u paraqitur” dhe “ndalim i daljes jashtë vendit”, të cilat SPAK kishte kërkuar pa miratim paraprak nga Kuvendi.
Në vendimin e saj, Gjykata pranoi pjesërisht kërkesën e Berishës, duke shfuqizuar masën e “ndalimit të daljes jashtë vendit” për shkak të cenimit të parimit të proporcionalitetit.
Sipas Kushtetueses, qëllimet e kësaj mase ishin të mbuluara nga masa tjetër, “detyrimi për t’u paraqitur”, e cila mbetet në fuqi.
Analiza e Gjykatës Kushtetuese
Gjykata shqyrtoi pretendimet e Berishës se SPAK kishte shkelur nenin 73/2 të Kushtetutës, duke mos marrë autorizim nga Kuvendi për vendosjen e masave. Duke iu referuar frymës së amendamentit kushtetues të vitit 2012 dhe precedentëve të mëparshëm, Gjykata interpretoi se neni 73/2 garanton mbrojtje procedurale vetëm për lirinë personale të deputetëve, jo për lirinë e lëvizjes. Kështu, autorizimi nga Kuvendi u konsiderua i panevojshëm për masën e ndalimit të lëvizjes
Për masën e “detyrimit për t’u paraqitur”, Gjykata vlerësoi se ajo nuk cenon funksionin parlamentar të një deputeti dhe nuk përbën kufizim të lirisë personale. Për rrjedhojë, kjo masë u konsiderua e vlefshme pa miratim nga Kuvendi.
Gjykata hodhi poshtë pretendimin e Berishës për mungesën e paanësisë së gjyqtarëve, duke theksuar se ligji parashikon garanci të mjaftueshme për pavarësinë e tyre. Po ashtu, u vlerësua se procesi gjyqësor i mëparshëm kishte respektuar standardet e rregullta të mbrojtjes juridike.
Në analizën e proporcionalitetit, Gjykata konkludoi se masa e “detyrimit për t’u paraqitur” është e domosdoshme dhe e përshtatshme, ndërsa masa e “ndalimit të daljes jashtë vendit” u cilësua e panevojshme, pasi qëllimet e saj arrihen me masën tjetër.
Gazetarja Enkeleda Mema raportoi për Euronews Albania se Gjykata Kushtetuese ka trajtuar vetëm ankimimin e parë të Berishës. Një ankim i dytë, që lidhet me masën e arrestit shtëpiak, pritet të shqyrtohet në vijim
Ky vendim i Kushtetueses ka shtuar debatin mbi kufizimet e masave ndaj zyrtarëve të lartë, duke sjellë në vëmendje nevojën për balancimin midis imunitetit të deputetëve dhe zbatimit të drejtësisë.
