Nënkryetari i Lidhjes Demokratike të Kosovës (LDK), Lutfi Haziri, ka reaguar ndaj kallëzimit penal të Ministrit të Bujqësisë, Faton Peci, ndaj disa zyrtarëve të LDK-së.
Reagimi i Hazirit në Debat Plus vjen pas njoftimit të Pecit në Facebook, ku ministri akuzoi kryetarin e LDK-së, Lumir Abdixhikun, dhe kryetarin e Forumit të Rinisë së LDK-së, Paris Gurin, për shtyrjen e fermerëve në deklarime të rreme për përfitime korruptive nga grantet bujqësore.
“Kur ka qenë Fatoni si këta djemtë e ri (që janë paditur nga ministri Peci), kur ka qenë i ri ka qenë këshilltari i imi në Qeveri. Besoj që u dashtë me mësu mirë, që kur je në Qeveri ke përgjegjësi publike ndaj të gjithëve dhe jo ndaj një parti që të ka bërë ministër. Këta dy djemtë e ri e kanë çaravesh krejt subvencionet, që i kanë nxjerrë, që e kanë çu me ndalë”, ka thënë Haziri.
“Ama bash asnjë minutë gjumin nuk u prishet”, ka shtuar Haziri teksa foli për zyrtarët që janë paditur, Paris Gurin dhe Egzon Pacolli – të cilët i bën publike disa raste që dyshohen për keqpërdorime me grante të bujqësisë.
