Dje ka përfunduar numërimi i të gjitha votave që u hodhën nëpër kuti votimi në zgjedhjet parlamentare të 9 shkurtit. Pra, KQZ’së iu deshën 24 ditë që të numërojë votat e rregullta, votat e diasporës, votat me kusht dhe ato të personave me aftësi të kufizuara. Tash pritet shpallja e rezultateve përfundimtare dhe certifikimi i tyre.
Më 9 shkurt në Kosovë u mbajtën zgjedhjet parlamentare. Menjëherë nisi numërimi i votave të rregullta për subjekte politike. Pas përfundimit të tyre, KQZ nisi t’i numërojë votat për kandidatët për deputetë, proces i cili pati nisur një ditë me vonesë dhe përfundoi më 22 shkurt.
Pas tyre filloi numërimi i votave të diasporës, që në këto zgjedhje u bë në dy mënyra- përmes postës dhe në përfaqësitë diplomatike.
Në dorën e punonjësve të QNR’së radha u erdhi edhe votave me kusht dhe votave të personave me aftësi të kufizuara.
Të gjitha këto zgjatën 24 ditë. Dje përfundoi i gjithë procesi i numërimit.
KQZ u kritikua se hyri e papërgatitur në këtë proces pasi faqja e saj ra natën e zgjedhjeve teksa po rezultatet po shfaqeshin. Hetimet janë duke u zhvilluar për të parë se cilat ishin shkaqet e dështimit të faqes natën e zgjedhjeve.
Çka pritet tash?
Pas përfundimit të numërimit, KQZ duhet t’i shpallë rezultatet përfundimtare.
Në një konferencë për media, zëdhënësi i KQZ’së, Valmir Elezi kishte thënë se rezultatet përfundimtare do të shpallen më 5 mars, ndërsa certifkimi do të bëhet më 18 mars. VV si duket për cështjen e koalicioneve s’do të lëvizë para kësaj date.
‘‘Së pari ne presim certifikimin e rezultateve dhe pastaj do të ulemi dhe të shikojmë për rrugën përpara” tha Kryeministri në largim Albin Kurti.
Elezi ka thënë se rezultatet përfundimtare nuk do të shpallen deri të paktën pas kalimit të afatit 48-orësh për ankesa në PZAP, i cili ka filluar të mërkurën në orën 21:00, e që përfundon të premtën në ora 21:00.
Ai ka shtuar se KQZ do të rinumërojë votat e një subjekti politik në Vushtrri pas kërkesës së Prokurorisë Themelore të Mitrovicës. Bëhet fjalë për votat e LDK’së.
Elezi kishte thënë se në proceset tjera zgjedhore KQZ’së i janë dashur 8-9 ditë pas shpalljes së rezultateve përfundimtare që t’i certifikojë ata.
Cilat janë rezultatet?
Fituese e këtyre zgjedhjeve është Lëvizja Vetëvendosje, e cila ka pësuar një rënie në numrin e mandateve që ka siguruar, nga 58 në 48. Ajo nga votat e rregullta ka marrë 40.90 për qind, në përfaqësitë diplomatike 80.71 për qind, nga votimi përmes postës 51.57 për qind, nga votat me kusht 44.25 për qind dhe nga votat e personave me aftësi të kufizuara 31.88 për qind.
Partia e dytë është Partia Demokratike e Kosovës e cila ka fituar 24 ulëse në Kuvendin e Kosovës. Nga votat e rregullta, PDK ka marrë 22.04 për qind, në përfaqësitë diplomatike 7.73 për qind, nga votimi me postë 9.48 për qind, me kusht 20.17 për qind dhe nga votimi i personave me nevoja të veçanta 24.02 për qind.
Lidhja Demokratike e Kosovës është e treta me 20 mandate, duke shënuar rritje nga zgjedhjet e 2021. Nga votat e rregullta LDK ka marrë 17.64 për qind, nga votat me postë 30.55 për qind, në përfaqësitë diplomatike 7.30 për qind, nga votimi me kusht 13.64 për qind dhe nga votimi i personave me nevoja të veçanta 19.54 për qind.
Koalicioni AAK- Nisma kanë marrë 8 deputetë së bashku. Haradinaj vetë i pesti dhe Limaj vetë i treti do të jenë pjesë e legjislaturës së nëntë të Kuvendit të Kosovës. Ata nga votat e rregullta kanë marrë 7.46 për qind, nga votimi në përfaqësitë diplomatike 1.97 për qind, nga votimi me postë 3.23 për qind, nga personat me nevoja të veçanta 8.86 për qind dhe nga votat me kusht 5.63 për qind.
Ndërkaq sa i përket 20 ulëse të garantuara, Lista Serbe do t’i ketë 9 pasi për herë të parë një ia ka marrë Nenad Rashiq.
10 mandate të minoriteteve joserbe do të ndahen kësisoj: Nga turqit Partia Demokratike Turke e Kosovës 2 ulëse; nga boshnjakët Partia Demokratike e Re 1 ulëse, Koalicioni Vakat 1 ulëse dhe Unioni Socialdemokrat 1 ulëse; nga egjiptianët Iniciativa e Re Demokratike e Kosovës 1 ulëse, Partia Liberale Egjiptiane 1 ulëse, nga ashkalinjtë Partia e Ashkalinjëve për Integrim 1 ulëse; nga goranët Partia Unike Gorane 1 ulëse; nga romës Partia Rome e Bashkuar e Kosovës 1 ulëse.
