Në kuadër të Forumit Ndërkombëtar për Gratë, Paqen dhe Sigurinë që po mbahet në Prishtinë, Presidentja e Kosovës, Vjosa Osmani, ka dekoruar me Medaljen Presidenciale për Shërbim Nënat e Srebrenicës – simbol i dhimbjes dhe forcës pas gjenocidit të vitit 1995 në Bosnje e Hercegovinë.
Gjatë ceremonisë solemne, Osmani përkujtoi masakrën e Srebrenicës, ku u vranë mbi 8 mijë burra dhe djem nga forcat gjenocidale të regjimit të Millosheviqit. Ajo theksoi se nënat ende nuk kanë varre për bijtë e tyre, por kanë gjetur kurajën për të kërkuar drejtësi, ashtu siç kanë bërë edhe nënat e Kosovës pas luftës.
“Ju jeni bërë zëri i atyre që nuk mund të flasin. Me çdo fotografi që e keni mbajtur në duar, keni ruajtur kujtimin e gjallë,” tha Osmani, duke theksuar se dekorata është nder për të gjitha gratë që nuk heshtën përballë padrejtësisë.
Në emër të Nënave të Srebrenicës, njëra nga përfaqësueset u shpreh se ndonëse kanë humbur fëmijët e tyre, nuk kanë humbur dinjitetin dhe krenarinë. “I kemi hapur sytë e botës ndaj të vërtetës dhe dinjitetit tonë,” tha ajo, duke përmendur përpjekjet për njohjen ndërkombëtare të gjenocidit përmes rezolutave në OKB.
Ceremonia u vlerësua si një gjest i fuqishëm solidariteti dhe kujtese mes Kosovës dhe Bosnjës, duke përforcuar mesazhin për drejtësi, paqe dhe siguri për gratë në rajon.
