Pas disa ditësh pasigurie të shkaktuar nga mbyllja e hapësirës ajrore izraelite, fluturimi i parë që transportonte qytetarë izraelitë të bllokuar jashtë vendit ka zbritur në aeroportin ndërkombëtar Ben Gurion.
Lajmin e ka konfirmuar Ministria izraelite e Transportit përmes një postimi në platformën Telegram, duke theksuar se operacioni po zhvillohet nën emrin “Kthim i Sigurt”.
Fluturimi, i operuar nga kompania kombëtare El Al, ka transportuar izraelitë të cilët ndodheshin në Larnaca të Qipros, dhe u kthyen të sigurt në shtëpi në orët e mëngjesit të së mërkurës.
Ministrja e Transportit, Miri Regev, tha se qëllimi i operacionit është “riatdhesimi i të gjithë qytetarëve izraelitë që janë bllokuar jashtë vendit për shkak të situatës aktuale”. Mbyllja e përkohshme e hapësirës ajrore është pasojë e rreziqeve të ngritura nga përshkallëzimi i situatës së sigurisë në rajon.
Ndërkohë, edhe vende të tjera po ndërmarrin hapa për të evakuuar qytetarët e tyre nga Izraeli. Polonia ka përfunduar me sukses evakuimin e parë të 160 qytetarëve polakë. Sipas reporterit të BBC-së, Adam Easton, këta qytetarë janë kthyer tashmë në vendin e tyre përmes një operacioni të organizuar nga autoritetet polake.
Situata e tensionuar në rajon ka shkaktuar ndërprerje të shumta në trafikun ajror dhe ka vënë në lëvizje qeveri të ndryshme për të garantuar kthimin e qytetarëve të tyre në mënyrë të sigurt.
Autoritetet izraelite kanë paralajmëruar se operacione të tilla do të vazhdojnë edhe në ditët në vijim.
