Komuna e Prishtinës ka zyrtarizuar një bashkëpunim të ri strategjik me Kryegjyshatën Botërore Bektashiane, me synimin për të promovuar diplomacinë ndërfetare, zhvillimin e qëndrueshëm dhe fuqizimin e të rinjve përmes edukimit dhe përfshirjes ndërkombëtare.
Të mërkurën, kryetari i Prishtinës, Përparim Rama, priti një delegacion të nivelit të lartë nga Kryegjyshata në kryeqytet, duke kulmuar me nënshkrimin e një Memorandumi Mirëkuptimi, i cili përfshin një sërë nismash me ndikim rajonal dhe evropian.
Delegacioni mysafir përbëhej nga Hirësia e Tij Edmond Brahimaj – Kryegjyshi Botëror, znj. Ana Abdi – përfaqësuese e autorizuar pranë institucioneve të BE-së, si dhe z. Arben Sulejmani – drejtor i Marrëdhënieve me Jashtë.
Memorandumi parasheh:
- Organizimin e Forumit Vjetor Ndërkombëtar për Diplomaci Kulturore dhe Ndërfetare, me pjesëmarrje nga 33 shtete;
- Bursa dhe trajnime për të rinjtë e Prishtinës në fushën e diplomacisë ndërkombëtare;
- Rotacion të baraspeshuar të forumit ndërmjet Tiranës dhe Prishtinës, duke e përfshirë kryeqytetin kosovar si bashkëorganizator të rregullt;
- Promovimin e turizmit ndërfetar dhe politikave të qëndrueshme të strehimit, në përputhje me agjendat evropiane për zhvillim të qëndrueshëm.
Kjo marrëveshje po konsiderohet si një hap i rëndësishëm në vendosjen e Prishtinës si një qendër të dialogut kulturor dhe bashkëpunimit ndërkombëtar.
