Kryeredaktori i RTK-së, Blerim Haxhiaj, ka reaguar ashpër ndaj akuzave të mediave vendore të cilët e kanë akuzuar në ditët e fundit për përfitime të dyshuara financiare nga qeveria e Albin Kurtit dhe për një intervistë të diskutueshme me kryeministrin në dorëheqje. Me një ton të fortë, ai i quan sulmet shpifje të koordinuara nga “mercenarë të gazetarisë” dhe paralajmëron ndjekje ligjore.
Blerim Haxhiaj, në një reagim të gjatë dhe emocional, ka denoncuar atë që ai e përshkruan si një fushatë të organizuar shpifjesh dhe shantazhi nga disa media në Kosovë.
Sipas tij, akuzat se ka përfituar 100 mijë euro nga qeveria përmes thirrjeve publike të Ministrisë së Kulturës për skenën e pavarur kulturore janë të pavërteta dhe spekulime dashakeqe.
Ai sqaron se OJQ-ja Cult Club, e cila përmendet në këto akuza, është një organizatë me gati dy dekada veprimtari, e drejtuar nga bashkëshortja e tij, Elmaze Nura, një figurë e njohur në skenën teatrore dhe akademike të Kosovës.
Haxhiaj thekson se nuk ka asnjë rol zyrtar në këtë organizatë dhe se projektet e saj kanë kontribuar për vite me radhë në kulturën kosovare, pavarësisht qeverive në pushtet.
Postimi i plotë
REAGIM NDAJ SHPIFJEVE DHE SHANTAZHIT TË MERCENARËVE MEDIATIKË
Një bashibozuk i gazetarisë dje bëri shpifjen e radhës dhe bashibozukët e tjerë e përhapën gënjeshtrën si zakonisht në mënyrë të koordinuar. Këta mercenarë të gazetarisë shpifën se paskam përfituar nga qeveria 100 mijë euro, duke iu referuar një thirrjeje publike të MKRS-së për skenën e pavarur kulturore kosovare. OJQ Cult Club, që përflitet nga shpifësit, po bën gati dy dekada të veprimtarisë së saj, me projekte të realizuara me sukses.
Në vitin 2006 unë kam qenë njëri nga themeluesit dhe kjo është pjesë e historikut të organizatës, e cila i ka strukturat e veta drejtuese dhe drejtoreshën, Elmaze Nura, bashkëshortja ime, e cila është ndër regjisoret më të sukseshme të teatrit, ish-drejtoreshë e Teatrit Kombëtar, doktore e shkencave dhe profesoreshë universitare në Fakultetin e Arteve. Cult Club ka kontribuar në skenën kulturore të vendit dhe shumë artistë, të rinj, nxënës, kanë përfituar në projektet e realizuara ndër vite, në qeveri të ndryshme si dhe me Programin Vjetor të organizatës.
Megjithatë, për klubin e bashibozukëve, nuk vlen e vërteta, por spekulimi, shpifja, shantazhi dhe linçimi. Kështu vepruan edhe para pak javësh pas një interviste me kryeministrin në detyrë, Albin Kurti. U mblodhën në disa panele të kontaminuara për të bërë ndotjen e radhës të opinionit publik. Njësoj, e bënë përpjekjen tjetër denigruese duke e ndërlidhur këtë intervistë me një OJQ me përvojë të gjatë ku unë nuk kam asnjë funksion zyrtar.
Këtyre paçavureve, u them se unë kam zgjedhur të mos e shes profesionin siç kanë bërë ata.
Në cilësinë e kryeredaktorit të RTK-së, puna ime shihet në ekran. Unë nuk jam si ndonjë nga bashibozukët që e merrnin dikur Albin Kurtin në veturë dhe i serviloseshin deri në studiot e tyre të kontaminuara. Shitblerje të intervistave bëjnë këta që lehin çdo natë në kor në disa studio televizive, ku misioni kryesor duket se është dezinformimi i publikut dhe propaganda.
Kjo fushatë e organizuar ndaj meje si herën e kaluar, edhe kjo djeshmja, tregon se mercenarizmi në gazetarinë e Kosovës, ka marrë përmasa alarmante.
Ju paralajmëroj se shqetësimet që këta shpifës po m’i shkaktojnë mua dhe familjes time, do të adresohen në organet përkatëse të drejtësisë.
Mes gazetarisë normale dhe anormalitetit të klubit të bashibozukëve, natyrisht mbetem te e para, pavarësisht shantazhit që po më bëhet në pozicionin ku jam aktualisht, në krye të politikës editoriale të RTK-së.
Ndërsa mediat e mercenarëve po e humbin ndikimin dhe besimin, sepse e kanë shitur profesionin, RTK po forcohet dhe mbetet dritarja kryesore e informimit korrekt në Kosovë, pavarësisht sfidave me të cilat përballet transmetuesi publik.
