Presidenti francez Emmanuel Macron ka njoftuar një rritje të ndjeshme të buxhetit ushtarak për dy vitet e ardhshme, me një shtesë prej 6.5 miliardë eurosh, në një kohë kur, sipas tij, Evropa përballet me kërcënime serioze nga Rusia, terrorizmi, sulmet kibernetike dhe fushatat e dezinformimit
Në një fjalim drejtuar Forcave të Armatosura, përpara festës kombëtare të 14 Korrikut, Macron theksoi se kontinenti nuk mund të mbështetet më vetëm te aleatët dhe se mbrojtja evropiane duhet të marrë në dorë fatin e vet. “Që të jemi të lirë në këtë botë, duhet të na kenë frikë. Dhe që të na kenë frikë, duhet të jemi të fortë,” u shpreh ai
Synimi: 64 miliardë euro për mbrojtjen deri në vitin 2027
Presidenti francez deklaroi se qëllimi është që buxheti vjetor i mbrojtjes të arrijë në 64 miliardë euro deri në vitin 2027 – më shumë se dyfishi i shpenzimeve të vitit 2017, kur ai mori detyrën. Edhe pse Franca përballet me borxh publik të lartë, Macron garantoi se mbrojtja kombëtare do të mbetet prioritet absolut.
Ky orientim gjen përkrahje të gjerë nga partitë e djathta, ndërsa forcat e majta e kanë kritikuar vendimin si një “goditje ndaj të drejtave sociale”.
Thirrje për dialog mbi armët bërthamore
Një tjetër theks në fjalën e Macron ishte roli i arsenaleve bërthamore franceze në mbrojtjen e Evropës. Ai i ftoi partnerët e BE-së për një dialog strategjik mbi këtë çështje, duke sugjeruar se siguria e kontinentit nuk mund të konsiderohet e plotë pa një përfshirje të drejtpërdrejtë në strategjinë bërthamore.
Ai paralajmëroi gjithashtu për ndikimin e fushatave të dezinformimit online, të cilat sipas tij tashmë synojnë edhe fëmijët nëpërmjet teknologjisë dhe rrjeteve sociale.
Rritje e përgjithshme e shpenzimeve ushtarake në Evropë
Sipas të dhënave të Institutit Ndërkombëtar për Paqe në Stokholm (SIPRI), shpenzimet për mbrojtjen në Evropë kanë njohur një rritje rekord në vitin e fundit, duke arritur 693 miliardë dollarë – 17% më shumë se një vit më parë – ritmi më i lartë që prej përfundimit të Luftës së Ftohtë.
Në këtë kontekst të tensionuar gjeopolitik, Macron duket i vendosur të pozicionojë Francën si një shtyllë kryesore të sigurisë evropiane, me një ushtri më të fortë, më të pavarur dhe më të gatshme për sfidat e kohës
