Bajram Gecaj, ish-zëvendësministër i pushtetit lokal dhe aktualisht këshilltar i kryetarit të Prishtinës, Perparim Rama, ka vendosur t’i përkushtohet astronomisë politike: ka nisur të studiojë “Uran-in”, por jo atë në qiell, por atë që zbret në Prishtinë për t’u bërë kryetar – Uran Ismailin nga PDK.
Në një reagim të gjatë, që përmban më shumë ironinë se manualet e fushatës së PDK-së, Gecaj sugjeron se Prishtina funksiononte më mirë para vitit 1947 – pra, kur nuk kishte as kryetar, as PDK, dhe as “projektime vizionare” me infografika në PowerPoint.
“Urani paska bërë disa hamendësime,” thotë Gecaj me një qetësi sarkastike që do ta kishin zili edhe satiristët e dikurshëm të “Zërit të Popullit”. Sipas tij, problemet si bërlloku nuk janë më vetëm fizikë, por kanë kaluar në nivelin e metaforës politike: “E shkaktuat vetë, e frytëzuat me konspiracione, dhe tani vini të na bindni që dini ta pastroni.”
Nëse bërlloku në Prishtinë është temë, Gecaj thotë se fletushkat e PDK-së janë si çereku i dytë i mbeturinave: të pariciklueshme, të panevojshme dhe shpërndarë në mënyrë të dyshimtë para kohe – një lloj fushate guerile që edhe e kaluara e ka përgjumur.
Me një “P.S.” që tingëllon si pasthirrma e një satire të ndaluar për të mitur, ai shton: “Në agim të mëngjesit, i shpërndanë fletushkat, ndonëse ende nuk ka nisur fushata zgjedhore. A është kjo shkelje? Për këtë le të flasin organet… jo ato të partisë, por ato të rendit publik.”
Ndërkohë, në një botë alternative ku të gjithë e kanë nga një projekt “madhor”, Gecaj përkujton qytetarët se “zhvillimi nuk vjen me anulime” – si ai i sheshit “Xhorxh Bush”, që mesa duket ka hyrë në histori si projekti më i kontestuar që nuk ndodhi kurrë.
Përfundimi ironik? Me një Prishtinë që nuk është shtet, me qen që enden më lirshëm se idetë e fushatës, dhe me rivalë që sillen “për inat të resë”, Gecaj na kujton se ndoshta e vetmja gjë që s’ka ndryshuar është aftësia e partive për t’i kthyer problemet në premtime dhe premtimet në letër – letër të pareciklueshme.
Në vend të epilogut: Qytetarët mezi po presin të shohin kush do ta fitojë këtë betejë – me projekte reale apo me fletushka të mëngjesit. Për momentin, Urani ndodhet në një orbitë ironie.
