Të paktën 27 persona kanë humbur jetën, përfshirë 25 fëmijë, pasi një avion luftarak i Forcave Ajrore të Bangladeshit u rrëzua mbi një kampus kolegji dhe shkolle në kryeqytetin Dhaka, kanë njoftuar zyrtarët.
Ngjarja tragjike ndodhi të hënën gjatë një fluturimi stërvitor rutinë, kur avioni F-7 BGI u përplas mbi ndërtesën e një shkolle, vetëm pak minuta pas ngritjes nga baza ajrore në Kurmitola.
Sipas autoriteteve, Reuters raporton se shkak i rrëzimit dyshohet të jetë një defekt teknik. Bëhet e ditur se në mesin e viktimave ishin edhe një mësues dhe vetë piloti, raportohet edhe për 88 persona të tjerë që janë shtruar në spital me djegie të rënda.
Qeveria e Bangladeshit ka shpallur një ditë zie kombëtare, me flamujt e ulur në gjysmë shtize dhe në të gjitha vendet e kultit janë mbajtur lutje për viktimat.
Avioni F-7 BGI është modeli më i avancuar i serisë kineze Chengdu J-7/F-7, ndërsa Bangladeshi ka blerë 16 të tillë nga Kina në vitin 2011.
Incidenti tragjik vjen ndërsa India fqinje ende po përballet me pasojat e një prej katastrofave më të mëdha ajrore të dekadës, ku muajin e kaluar një avion i Air India u përplas mbi një konvikt në Ahmedabad, duke lënë 260 të vdekur.
