Barcelona ka disa fronte të hapura në këtë merkato verore, me fokusin aktual te largimet, pasi disa lojtarë janë në pritje të vendimeve për të ardhmen e tyre.
Pas zyrtarizimit të Marcus Rashford si lojtar i ri i katalanasve, nuk priten shumë afrime të tjera gjatë këtij afati, përveç ndonjë rasti të veçantë në minutat e fundit.
Klubi është përqendruar tani në balancimin e financave dhe regjistrimin e lojtarëve të rinj, gjë që do të varet edhe nga largimet e mundshme.
Një nga emrat që përmendet është mesfushori i ri Marc Bernal, i cili është rikuperuar pas një lëndimi që e mbajti jashtë fushave që nga gushti i kaluar.
Sky Sport ka raportuar se gjiganti italian Roma ka shprehur interes serioz për 18-vjeçarin, por sipas raportimeve më të fundit, në garë është futur edhe Real Betis, që dëshiron transferimin e tij këtë verë.
Barcelona është e gatshme ta lejojë largimin e Bernal për një shumë prej 10 milionë eurosh, por me kusht që në marrëveshje të përfshihet një klauzolë riblerjeje brenda dy viteve të ardhshme.
Trajneri Hansi Flick ende nuk ka marrë një vendim përfundimtar, ndërsa situata e Bernal pritet të qartësohet në javët në vijim, në varësi të ofertave që do të arrijnë në tavolinë.
