Kriza institucionale në Kosovë po thellohet, ndërsa tensionet rreth funksionimit të Gjykatës Kushtetuese kanë marrë një kthesë shqetësuese. Tërheqja e kërkesës KO215/25 nga presidentja Vjosa Osmani më 5 gusht 2025, pas caktimit të gjyqtarit Radomir Laban si raportues, ka ndezur alarmin për paralizë të sistemit kushtetues.
Presidentja Osmani, në një konferencë për media, deklaroi se Laban nuk është emëruar nga ajo dhe se prania e tij në këtë çështje përbën rrezik për sigurinë e vendit. Ajo e cilësoi veprimin e saj si përpjekje për të mbrojtur rendin kushtetues dhe demokracinë institucionale — por pasojat e këtij vendimi mund të jenë shumë më të rënda se sa pritej.
Në një intervistë për emisionin “DPT Fidani” në Klan Kosova, avokati Arianit Koci paralajmëroi se largimi i Labanit nga funksioni do të çonte në kolaps të Gjykatës Kushtetuese. “Nëse ai nuk është në funksion, ne nuk kemi më Gjykatë Kushtetuese,” tha Koci, duke theksuar se kuorumi minimal prej shtatë gjyqtarësh është në rrezik, ndërsa dy pozita mbeten të zbrazëta për shkak të neglizhencës së deputetëve.
Koci nuk e mohoi profesionalizmin e Labanit, duke e cilësuar si një prej juristëve më të mirë në institucion, por pranoi se shqetësimet e presidentes nuk janë pa bazë. Ai komentoi edhe akuzat e Lëvizjes Vetëvendosje për lidhje të mundshme të Labanit me BIA-n dhe Milan Radoiçiqin, të kërkuarin për sulmin në Banjskë në vitin 2023.
“Kjo situatë është e papranueshme. Nuk kemi Kuvend funksional, Qeveria është në detyrë, dhe tani rrezikojmë të mbetemi pa Gjykatë Kushtetuese. Ne po i dëshmojmë botës se nuk jemi në gjendje të mbajmë shtetin,” përfundoi Koci me tone të ashpra.
Ky zhvillim ngre pikëpyetje serioze mbi stabilitetin institucional të Kosovës dhe fuqinë e saj për të garantuar funksionimin demokratik në kushtet e një krize të thellë politike dhe juridike.
