Presidentja e Kosovës, Vjosa Osmani, është përballur me kritika të ashpra pas dorëzimit të komenteve të saj në Gjykatën Kushtetuese lidhur me ankesën e fundit të Listës Serbe për procedurën e zgjedhjes së kryesisë së Kuvendit.
Analisti politik Agon Maliqi ka reaguar publikisht, duke e cilësuar veprimin e Osmanit si një “manovër partizane” që, sipas tij, e ka shndërruar zyrën presidenciale nga një simbol unifikimi në një instrument të interesit personal politik.
Në një deklaratë për media, Maliqi ka vlerësuar se gjatë krizës politike dhe institucionale të këtij viti, Osmani ka qenë “nën nivelin e detyrës”, duke dështuar të luajë rolin e saj si gardiane e funksionalitetit institucional.
Ai ka theksuar se përdorimi i pozitës së nënkryetarit të Kuvendit si mjet veto për bllokimin e themelimit të institucioneve po vjen nga shumica shqiptare, jo nga komuniteti serb, i cili sipas tij nuk ka refuzuar nominimin të kandidatëve për pozita kyçe.
Komentet e presidentes lidhen me ankesën e dorëzuar nga Lista Serbe, e cila konteston mënyrën e votimit të nënkryetarëve të Kuvendit nga komunitetet jo-shumicë. Sipas tyre, votimi është bërë ndaras dhe jo në pako, siç ishte praktika për nënkryetarët e tjerë, duke ngritur shqetësime për përfaqësimin dhe procedurën.
Maliqi ka paralajmëruar se nëse Osmani po synon të sigurojë mbështetje për një mandat të dytë përmes këtyre veprimeve, atëherë “i ka bërë vetes antireklamën më të madhe të mundshme”. Ai ka shtuar se presidentja ka humbur mundësinë për të qenë faktor zgjidhjeje dhe ka zgjedhur të pozicionohet si aktore politike me interesa të ngushta.
Gjykata Kushtetuese pritet të shqyrtojë komentet e dorëzuara dhe të japë një vendim mbi vlefshmërinë e procedurës së votimit, çka mund të ketë ndikim të drejtpërdrejtë në funksionalitetin e Kuvendit dhe stabilitetin institucional të vendit.
