Meta ka prezantuar një linjë të re syzesh inteligjente në bashkëpunim me Ray-Ban, të cilat sipas CEO-së Mark Zuckerberg, do të sjellin një përvojë të avancuar të inteligjencës artificiale për përdoruesit në mbarë botën.
Modeli i ri, Meta Ray-Ban Display, përmban një ekran me ngjyra të plota, rezolucion të lartë në një lente të vetme, një kamerë 12MP dhe mundësi për video-thirrje, marrje mesazhesh dhe përdorim të komandave përmes një byzylyku nervor që lexon gjestet e dorës.
Me një çmim prej 799 dollarësh, syzet pritet të jenë të disponueshme në treg brenda këtij muaji. Meta shpreson t’i kthejë ato në një mjet të përditshëm dhe thelbësor për jetën digjitale të njerëzve.
Por prezantimi vjen në një moment të ndjeshëm për kompaninë: Meta ndodhet nën kritika të ashpra publike, me protesta në selinë e saj në Nju Jork nga prindër dhe aktivistë që kërkojnë mbrojtje më të madhe për fëmijët në platformat sociale.
Dy ish-hulumtues të sigurisë kanë deklaruar se Meta ka paguar për të heshtur efektet negative të teknologjive të saj VR te fëmijët – një akuzë që kompania e ka mohuar kategorikisht, duke theksuar përkushtimin për një balancë mes inovacionit dhe përgjegjësisë sociale.
