Rreshterja e Klasit të Parë, Tresa Allemang, dhe djali i saj, Kapiten Aiden Stackhouse, të caktuar në Ekipin Luftarak të Brigadës së 256-të të Këmbësorisë, po shërbejnë së bashku në misionin e KFOR-it të udhëhequr nga NATO në Kosovë. Nëna dhe djali kanë mundësinë unike të ndajnë një ëndërr të përbashkët – të shërbejnë krah për krah në të njëjtin mision.
Për Rreshteren Allemang, shërbimi në ushtri ka qenë gjithmonë më shumë sesa një karrierë – ka qenë një trashëgimi familjare.
Rreshterja Allemang u rekrutua në moshën 17 vjeçe, ndërsa ishte ende në shkollë të mesme. Disa vjet më vonë, ajo u largua nga shërbimi pasi u bë nënë. Ajo u rikthye në Ushtri në moshën 25 vjeçe me qëllimin për të përdorur përfitimet e kolegjit.
Në vitin 2010, ajo u caktua në Irak me Ekipin Luftarak të Brigadës së 256-të të Këmbësorisë, ose IBCT, raporton uebfaqja zyrtare e Gardës Kombëtare të ShBA-së “NationalGuard.mil“.
Gjatë përgatitjeve për atë mision, djali i saj i vogël, Aiden, vetëm 3 vjeç në atë kohë, u ngjit në çantën e saj të shpinës, i vendosur për të shkuar me të. Gjatë fëmijërisë së tij, ai ishte gjithmonë pranë saj – qoftë duke parë ushtarë që zbrisnin nga helikopterët, qoftë duke marrë pjesë në evente rekrutimi, gjithmonë i veshur me një uniformë të vogël që përputhej me të nënës së tij. Edhe vizatimet e shkollës së tij ishin të mbushura me ushtarë, tanke dhe helikopterë – një dëshmi e ëndrrës që do të bëhej realitet.
Vite më vonë, një nga ish-rekrutët e Allemangut, rreshterja e shtabit Angela Coke, e rekrutoi Aiden në ushtri, duke mbyllur një cikël të plotë familjar. Pasi u diplomua si mjek luftarak, Aiden mezi priste të nisej në misionin e tij të parë.
Kur u hap një vend i papritur në misionin e IBCT-së, nëna e tij nuk hezitoi. “Absolutisht. Vendoseni në të,” tha ajo me entuziazëm, duke e ditur që djali i saj do të pranonte. Më pas, edhe Allemang u ftua të bashkohej në mision – një mundësi unike për të shërbyer përkrah djalit të saj para daljes në pension.
“Më pëlqen të bëj shaka se Aiden u ngjit në çantën time të shpinës kur ishte 3 vjeç,” thotë Allemang.
“Këtë herë, unë u ngjita në të tijën.”
Edhe pse punojnë në pjesë të ndryshme të Kosovës, ajo thotë se tani rolet janë përmbysur.
“Ndihem si një 3-vjeçare që e shikoj me admirim çdo lëvizje të tij,” shprehet Allemang.
Për të, ky mision nuk ka të bëjë vetëm me detyrën ushtarake – ka të bëjë me trashëgiminë e familjes së saj. E njëjta trashëgimi vazhdon sot, nëpërmjet djalit të saj, në të njëjtin mision ku dikur shërbeu edhe ajo.
